Зидан супертаркибга бош мураббийлик қилишга кўнди

“Реал”ни икки маротаба бошқарганидан кейин бир неча йил давомида ишсиз юрган Зинедин Зидан  яна футболга қайтадиган бўлди.

El Nacional нашрининг ёзишича, Зинедин Зидан бир пайтлар ўзи порлаган Франция терма жамоасида бош мураббий лавозимини эгаллашга кўнди.

Манбага кўра, Франция футбол федерацияси машҳур юлдуз билан ҳамкорлик борасида келишувга эришгани маълум бўлди.

Франция терма жамоасининг амалдаги бош мураббийи Дидье Дешам 2026 йили АҚШ, Мексика ва Канадада бўладиган жаҳон чемпионатидан кейин бошқарувни топшириши келишилган. Унинг ўрнини энди Зидан эгаллайди.

Зинедин Зидан “Реал”да кетма-кет уч марта Европа Чемпионлар лигаси бош совринини қўлга киритган. Шунингдек, икки бор жамоани Испания чемпионига айлантирган. 2021 йили Мадридни тарк этган мутахассис ўзига бўлган барча таклифларни рад этиб келмоқда.

Зидан кейинги йилларда келажакдаги мақсади Франция терма жамоасини бошқариш эканини очиқ-ойдин таъкидлаб келади.