Зинедин Зидан Франция терма жамоаси билан шартнома бўйича келишди

Афсонавий француз футболчиси Зинедин Зидан Франция терма жамоасининг янги бош мураббийи этиб тайинланиши кутилмоқда, деб хабар бермоқда Фабрицио Романо.

Маълумотларга кўра, 53 ёшли мутахассис шартнома шартларини тўлиқ келишиб олган ва ўз мураббийлар штабини ҳам шакллантириб бўлган. Расмий эълон ва шартнома имзоланиши яқин кунларда, Дидье Дешам миллий жамоа бош мураббийлиги лавозимини тарк этганидан сўнг амалга оширилиши режалаштирилган.

Зидан бир неча ой олдиноқ айнан Франция Футбол федерациясидан таклиф кутишга қарор қилгани, шу мақсадда бошқа клуб ва терма жамоалардан келган таклифларни рад этгани қайд этилмоқда.

Дидье Дешам 2012 йилдан буён Франция термасини бошқариб келаётган эди. Унинг қўл остида жамоа 2018 йилда жаҳон чемпиони бўлди, Миллатлар лигасида ғалаба қозонди, шунингдек, жаҳон чемпионати-2022 ва Евро-2016 финалигача етиб борди. Зидан эса мураббий сифатида фақат Мадриднинг «Реал» клубида ишлаган: у ерда жамоа билан уч марта кетма-кет Чемпионлар лигасида зафар қучди ва икки бор Испания чемпионига айланди.

14 июль куни Арлингтон шаҳридаги стадионда Дешам бошчилигидаги Франция терма жамоаси жаҳон чемпионати-2026 ярим финалида Испанияга 0:2 ҳисобида мағлуб бўлиб, финалга чиқиш имкониятидан маҳрум бўлди.