​“Ливерпуль” “Реал” трансферини барбод қилмоқчи

Охирги пайтда Европа матбуоти ва нуфузли манбалар Англия чемпиони “Ливерпул”"нинг етакчи ярим ҳимоячиси Доминик Собослаини Мадриднинг “Реал” клуби билан боғламоқда.

Венгрия миллий терма жамоаси мураббийи Марко Росси бу миш-мишларга янада куч берди.Унинг айтишича, Собослаи болалигидан “Реал”да ўйнашни орзу қилган.

Бир неча манбалар Собослаи мадридликлар билан шахсий шартнома бўйича оғзаки келишувга эришгани, “Қироллик клуби” таклиф қилган маош ўйинчи “Ливерпуль”дан талаб қилган миқдорда экани, ўйинчи Мадридга кўчиб ўтишга розилик бергани ҳақида ёзди.

Барча гап-сўзларга қарамай, “Ливерпуль” раҳбарияти венгриялик футболчини сотишни режалаштирмаяпти.

TEAMtalk хабар беришича, мерсисайдликлар Собослаи билан шартномани узайтиришни мақсад қилган ва музокаралар давом этмоқда.

25 ёшли футболчининг амалдаги шартномаси уни “Ливерпуль” билан 2028 йил ўртасигача боғлаб туради. Футболчи вакиллари клубдан Собослаининг меҳнат ҳақини ўйинига яраша сезиларли даражада оширишни сўраган.

Transfermarkt портали футболчининг қийматини 85 миллион евро деб баҳоламоқда.