Hamidjon Aktamov yo‘lda "Qizilqum" avtobusi buzilganda "Surxon" yordam bermay ketgani uchun mag‘lubiyatga uchrashganini aytdi

«Surxon» - «Qizilqum» uchrashuvidan keyingi matbuot anjumanida mehmonlar ustozi Hamidjon Aktamov o‘z fikrlarini bildirib o‘tdi. Bu haqda "Surxon" klubi matbuot xizmati xabar berdi.

- Men bugungi o‘yin haqida fikr bildirishdan oldin, Termizga kelishimizdagi qiyinchiliklar haqida gapirib o‘tmoqchi edim. Biz G‘uzorga yaqinlashganimizda yo‘lda avtobusimiz buzilib qoldi. Ancha vaqt yo‘lda ushlanib qoldik. Shu vaqtda «Surxon» jamoasi avtobusi yonimizdan o‘tib ketdi. O‘ylashimcha, «Surxon» bizga yordam ko‘rsatishi kerak edi. Termizda mehmonxona topishda ham muammolarga duch keldik. Deyarli, barcha mehmonxonalar band. Mana shu sabablar o‘yinga ta’sir ko‘rsatdi deb o‘ylayman. Futbol bu - do‘stlik.

O‘yin haqida to‘htaladigan bo‘lsam, 70 daqiqa yaxshi harakat qildik. Qulay imkoniyatlardan foydalana olmadik. «Surxon» o‘ziga yaratilgan imkoniyatlardan foydalanib, g‘alabani qo‘lga kiritdi. Hakamlarga e’tirozim yo‘q. Ular o‘yinni yaxshi boshqarishdi. Surxondaryo xalqini bugungi g‘alaba bilan tabriklayman, - dedi Aktamov.

P.S. Termizda «halqaro forum» va O‘zbekiston Respublikasi Mustaqilligining 28 yillik bayram tadbirlari bo‘lganligi sabab, barcha mehmonxonalarda joy bilan bog‘liq muammolar yuzaga kelgan.