Terma jamoamiz sardori yarim finaldagi g‘alabadan so‘ng nimalar dedi?

U20 Osiyo chempionati yarim finalidan o‘rin olgan O‘zbekiston hamda Koreya Respublikasi terma jamoalari o‘rtasidagi bahsdan so‘ng, terma jamoamiz sardori Umarali Rahmonaliev o‘z fikrlari bilan o‘rtoqlashdi.

“Avvalambor g‘alaba bilan barcha muxlislarni, butun xalqimizni tabriklayman. Oldimizda yana bir o‘yin kutib turibdi. Ushbu uchrashuvda ham borimizni berib, muxlislarni xursand qilishga harakat qilamiz. Bor kuch-g‘ayratimizni ishga solamiz. Bizni qo‘llab-quvvatlab, bizga ko‘mak berib turgan muxlislarga mingdan-ming rahmat aytamiz. Sababi, ular biz uchun borini berishdi, qo‘llab-quvvatlashdi. Biz ham bo‘lajak o‘yinda borimizni beramiz.

Biz Koreya terma jamoasining o‘yinlarini o‘rganib chiqqan edik. Murabbiylarimiz o‘yinni qanday olib borish, qanday taktikada o‘ynash va nechanchi daqiqada qanday o‘zgarishlar qilinishini aniq belgilab olgan edi. Biz esa murabbiylarimiz tomonidan berilgan vazifalarni bajardik.

O‘ylaymanki, bugun o‘yin jihatidan ham biz g‘alabaga haqli edik”, - dedi Rahmonaliev.