“Манчестер Сити” жаҳон чемпионатига олиб кетмайдиган футболчи номини эълон қилди

Ўзбекистон миллий терма жамоаси марказий ҳимоячиси Абдуқодир Ҳусанов тез орада ўзи учун янги мусобақа – ФИФА томонидан янги форматда ўтказилаётган клублар ўртасидаги жаҳон чемпионатида қатнашиш учун “Манчестер Сити” таркибида АҚШга йўл олиши кутилмоқда.

Айни пайтда “шаҳарликлар” янгича мусобақада қатнашадиган футболчилар таркибини шакллантириш билан банд.  Клуб  мусобақа ташкилотчиларига жами 35 та футболчидан таркиб топган якуний қайдномани топшириши керак. Шунга қарамай, манчестерликлар бу рўйхатни ҳали тўлиқ тузиб чиққани йўқ.  

Sky Sports нашрининг маълум қилишича, бош мураббий Хосеп Гвардиола бўлажак турнирга машҳур футболчи Жек Грилишни олиб кетмасликка қарор қилди.

Экспертларнинг таъкидлашича, клуб мутасаддилари англиялик футболчига ёзги трансферлар даврида ўзига янги жамоа топиши учун имконият яратиб бериш мақсадида уни АҚШга олиб кетмайди.

Яқинда Хосеп Гвардиола келаси мавсум олдидан Жек Грилиш билан хайрлашишга тайёрлигини айтган эди. “Манчестер Сити” Англия футболининг энг ёрқин талантларидан ҳисобланган Грилишни 2021 йили ёзда рекорд сумма – 117,5 миллион еврога харид қилган.

Бир неча мавсум давомида “Астон Вилла” етакчиси сифатида порлаган Грилиш Хосеп Гвардиола қўл остида ўзининг юқори даражасига кўтарила олмади. Айниқса, охирги икки мавсумда 29 ёшли ҳужумкор футболчининг ҳаракатлари клубдаги умуман қониқтиргани йўқ.

Грилишнинг клуб билан келишуви яна икки йил давом этади. “Манчестер Сити” ўйинчига Англия Премьер-лигасининг ўзидан ва хориждан таклиф чиқишини кутяпти. Бироқ трансфер бўйича экспертлар Жекнинг ёши ва маоши катталигини инобатга олиб, бу ўйинчи ўзига янги жамоа топиши қийинлигини таъкидламоқда.

Тажрибали ҳужумкор футболчи якунланган мавсумда барча турнирларда 32 маротаба майдонга тушиб, учта гол урди холос. Айниқса, унинг атиги етти марта бошланғич таркибга жалб қилингани Хосеп Гвардиола ва мураббийлар штаби бу футболчидан умид узганидан далолат беради.

Бундан ташқари, Жек Грилиш Англия миллий терма жамоаси асосий таркибидаги жойини ҳам йўқотган. Тажрибали футболчи терма жамоанинг охирги тўртта ўйинида қайдномага ҳам киритилмади.

Шунга қарамай, таъкидлаш лозимки, Жек Грилиш ўзбекистонлик жамоадоши Абдуқодир Ҳусанов билан дўстона алоқага эга. Машҳур футболчи яқинда Абдуқодирга видеохабар юбориб, ҳамюртимизни никоҳ тўйи билан табриклади.

Эслатиб ўтамиз, “Манчестер Сити” 15 июнь куни старт оладиган ва дунёнинг барча минтақаларидан 32 та жамоа қатнашаётган клублар ўртасидаги жаҳон чемпионатининг “G” гуруҳидан жой олган.

Гвардиола шогирдлари бу квартетдан чиқиш учун Италиянинг “Ювентус”, Бирлашган Араб Амирликларининг “Ал-Айн” ва Марокашнинг “Видад” жамоалари билан рақобатлашади. Қоидага кўра, ҳар бир гуруҳда дастлабки икки ўринни эгаллаган жамоалар плей-оффга чиқиб, бош соврин учун юришни давом эттиради.

Файзуллаев ўзини "қийнаган" мураббийдан қутилди!

Ўзбекистондек мундиалга чиқиш учун футболдан бегона одамларни йўқотиш керак!

Ҳусановнинг “Манчестер Сити”даги келажаги муҳим қарорга боғлиқ?