"Futures Cup" турнири. Илк кунда 4 нафар боксчимиз рингга кўтарилди

Куни кеча Таиланднинг Бангкок шаҳри мезбонлик қилаётган бокс бўйича ёшлар ўртасида "Futures Cup" халқаро турнири старт олди. Ушбу мусобақада икки терма жамоамиз ҳам иштирок этмоқда. Илк кунда 4 нафар вакилимизнинг жанглари режалаштирилган эди.

-54 кг вазнда бўлиб ўтган Сабрина Чакоманова ва хитойлик Ванг Яоруню иштирокидаги баҳс қизғин тарзда бўлиб ўтди. Якунда вакиламиз рақибасини 3:2 ҳисобида мағлуб этиб, кейинги босқичга йўл олди.

Абдуғани Ёрқинжонов ҳам кейинги босқичда. Боксчимиз -50 кг вазнда бўлиб ўтган баҳсда, арманистонлик Киракосян Тиграндан 5:0 ҳисобида устун келди.

-60 кг вазнда бўлиб ўтган баҳсда, Бобомурод Боймирзаев Гонконг боксчиси Ордонез Жефетга имкон қолдирмади. 5:0.

Сўнгги баҳсда, -70 кг вазнда Саидхўжа Садиллахўжаев Янги Зеландия вакили Коллиер Ноани 4:1 ҳисобида мағлубиятга учратди.

Бу ҳақда Ўзбекистон бокс федерацияси хабар бермоқда.