"Yoki hozir yoki yozda ketishim aniq edi" - Bektemir Abdumannonovning "Dinamo"dagi faoliyati nega juda qisqa bo‘lgani va nima uchun Qozog‘istonga ketgani haqida

Иқтидорли қанот ярим ҳимоячиси Бектемир Абдуманнонов қишда “Андижон”дан “Динамо”га ўтганди. Бироқ футболчининг самарқандликлар сафидаги фаолияти узоққа чўзилмади ва у кутилмаганда Қозоғистонга кўчиб ўтди.

Эндиликда футболчи “Окжетпес” сафида тўп сурмоқда.

Куни кеча Sports.uz журналисти Абдуманнонов билан мавжуд вазият юзасидан суҳбатлашди.

- Рости, "Динамо"га қўшилганингизга ҳали кўп вақт бўлмасдан сизни Қозоғистон чемпионатида пайдо бўлишингизни умуман кутмагандик. Воқеалар ривожи нега бунчалик ўзгариб кетди?

- Ассалому алайкум. “Динамо”га ўтишим сабаби, у ёқда ўйин амалиётига эга бўлиш эди. Мураббийни нима сабабдан ўйнатмаганини билмайман. Қозоғистонга ўйин амалиёти учун келдим.

- Фаолиятингизда бундай ўзгариш рўй бериши ўзингиз учун ҳам кутилмаган ҳолат бўлдими?

- Ҳа, шунақа деса ҳам бўлади. Ёки ҳозир ёки ёзда кетишим аниқ эди.

- "Динамо"дан кетиб шошилмадингизми? Чунки у ерга ўтганингизга ҳали кўп бўлмаганди ва балки мураббий сизга яна имкон берармиди?!

- Агар имкон берганда 4 турдан 1 тасида имкон берарди. Ҳаммаси ўз вақтида тугади.

- Нима деб ўйлайсиз, бундан чиқди, “Динамо”га ўтишингиз хато қарор бўлдими?

- Хато эмас. Бу мураббий билан боғлиқ савол. Ўзлари таклиф қилиб сотиб олди. Ўйнатмади, бу мени хатоим эмас.

- Абрамов билан кетишингиз ҳақида гаплашдингизми? Мураббий қандай реакция билдирди?

- Вариант борлигини айтдим. Кўриб чиқиб, қўйиб юборишга рухсат берди.

- “Окжетпес”да сизни қандай қарши олишди?

- Жамоа ҳар томонлама яхши. Ташкилий томондан бизни чемпионатдан бир қадам олдинда.

- “Окжетпес”даги яратилган шароитлар қандай экан? Масалан, ўзимизни клублар билан солиштирганда қандай?

- Бизни клублардан анча яхши, ҳар томонлама.

- Янги клубдаги дебютингизни ўтказдингиз ва 1:1 ҳисоби қайд этилди. Таассуротлар қандай бўлди?

- Биринчи ўйин бўлишига қарамай, яхши ўйин бўлди. Жамоага киришиб кетиш қийин бўлмади. Жамоа ютқазаётганди. Майдонга тушиб ёрдам беришга ҳаракат қилдим. Охирги дақиқаларда гол уриб ҳисобни тенглаштириб кетдик.

- Келишув қандай бўлди: “Динамо” сизни ижарага бердими ёки қозоқ клуби трансферингизни сотиб олдими?

- Ижарага берди.

- Илк бор легионерга айландингиз. Кўникишда, мослашишда қийналмаяпсизми? Бу борада сизни кўпроқ ким қўллаб-қувватлаяпти?

- Қийинчилик йўқ. Мураббий ҳамма нарсани тушунтириб қўйди. Жамоадагилар ҳам анча яхши йигитлар. “Андижон”да бирга ўйнаган Абинур Нуримбет ҳам ушбу клубда. 1-2 кун ичида жамоа билан мослашиб бўлдим.