Серхио Рамосга Испаниядан жамоа топилди

«Хетафе» клуби президенти Анхель Торрес журналистлар билан суҳбатда жамоа яқин вақт ичида «Реал Мадрид» собиқ ҳимоячиси Серхио Рамос билан шартнома имзолашни исташаётганини маълум қилди.

Торреснинг таъкидлашича, 40 ёшли испаниялик футболчи «Хетафе» учун кўриб чиқилаётган асосий номзодлар рўйхатига киритилган.

«Унинг акаси, шу билан бирга агент сифатида, бу масала бўйича мен билан гаплашди. Биз бу трансфер амалга ошишини жуда хоҳлардик», – деди «Хетафе» президенти As нашрига берган изоҳида.

Маълумот учун, тажрибали испаниялик ҳимоячи ҳозирча эркин агент мақомида, яъни ҳеч қайси клуб билан шартномага эга эмас. Рамоснинг сўнгги жамоаси Мексиканинг «Монтеррей» клуби бўлган. У ўз карьерасининг катта қисмини «Реал Мадрид» сафида ўтказган.

Шунингдек, яқинда «Хетафе» яна бир собиқ «Реал Мадрид» футболчиси – Даниэль Карвахаль билан ҳам шартнома имзолагани қайд этилмоқда.