УЕФА Ҳусанов жамоасига жиддий жазо қўллаши кутиляпти

17.10.2026 05:59
Zohir Toshxo’jayev
0
Футбол

Англиянинг машҳур «Манчестер Сити» клуби УЕФА томонидан жиддий жазога дуч келиши мумкин, деб хабар бермоқда Европа оммавий ахборот воситалари.

Маълумотларга кўра, клубнинг молиявий қоидаларни кўплаб бузиш ҳолатлари бўйича берган шикояти рад этилса, «Манчестер Сити» етти йилдан ўн йилгача Европа мусобақаларидан четлатилиши кутилмоқда.

Журналист Сесар Аугусто Лондоньо маълумотига кўра, УЕФА ўз қарорини Англия Премьер-лигаси расман айбловларни тасдиқлагандан сўнг эълон қилади. Клубга молиявий фэйр-плэй қоидаларининг 115 бандидан 114 тасини бузган, деган айблов қўйилган.

Агар дисквалификация ҳақида қарор чиқарилса, «Манчестер Сити» камида 2034 йилгача Европа кубокларида иштирок эта олмайди. Шу билан бирга, клубни олдин қўлга киритган чемпионлик ва бошқа унвонларидан маҳрум этиш масаласи кўриб чиқилмаётгани қайд этилмоқда.

«Манчестер Сити» сафида Ўзбекистон терма жамоаси ҳимоячиси Абдукодир Хусанов ҳам тўп сурмоқда. У жорий мавсумда клуб таркибида етти ўйинда майдонга тушди, бироқ ҳозирча гол ёки голли узатма билан ажралиб тургани йўқ.

Таъкидлаш жоизки, манчестерликларга қўлланилиши мумкин бўлган жазо чоралари клубдаги етакчи ўйинчилар фаолияти ва келажагига бевосита таъсир ўтказади. Айни пайтда Европанинг бир қатор клублари «Манчестер Сити» таркибида ўйнаётган футболчилар билан ҳозирдан келишиб олишга ҳаракат қилмоқда.

Хусусан, яқинда хориж манбаларида Абдуқодир Ҳусановга Англиянинг «Челси», «Астон Вилла», «Эвертон» ва «Борнмут» каби клубларидан жиддий қизиқиш бўлаётгани ҳақида маълумотлар тарқатилган эди.

Экспертларнинг таъкидлашича, агар клуб қуйи лигага тушириб юборилса, жамоанинг асосий футболчилари бошқа жамоаларга ўтиб кетишига тўғри келади. Энди УЕФА ҳам «Манчестер Сити»га халқаро майдонда ўйнаш ҳуқуқини чекласа, бу ўйинчиларнинг Манчестердан кетишига энг катта туртки бўлади.