Ҳакамлар “Барселона”га ён босади(ми)
“ПСЖ” бош мураббийи Унаи Эмерининг фикрича кеча ҳакамлар мезбонлар фойдасида “ишлаган”. Ҳақиқатдан шундайми ёки йўқ буниси менга қоронғу. Аммо “шамол бўлмаса, дарахтнинг учи қимирламайди” деган гап бекорга айтилмаган. Шундай экан бугун ҳакамлар “Барселона”га ўзи иста(ма)ган холда ёрдам қилиб юборган ҳолатларни эслаб ўтамиз.
Андрес Фриск. “Барселона” – “Челси” (2004/05, 1/8 финал)
“Барселона”нинг 2:1 ҳисобидаги ғалабаси билан якунланган учрашув Фрискнинг кейинги тақдирини ҳал қилган эди. Гап шундаки танаффус пайти ҳакам каталонияликлар бош мураббийи Франк Райкаард билан мулоқатда бўлади. Иккинчи бўлимда эса тақдир тақозоси билан “Челси” ҳужумчиси Дидье Дрогбани майдондан четлатади. Шу тариқа Фриск атрофида турли хил салбий фикрлар авжига чиқади. Лондонлик мухлислар ва Моуриньонинг сон-саноқсиз дўқ-пўписаларидан сўнг швециялик ҳакам фаолиятини якунлашга мажбур бўлган эди.
Эвребе. “Челси” – “Барселона” (2008/09 йил, ярим финал)
Ушбу жамоаларнинг дастлабки ўйинида «Камп Ноу»да ҳисоб очилмаган эди. Жавоб учрашуви эҳтиросларнинг авжига чиқишига олиб келди. Эссьен 9-дақиқадаёқ супер гол киритиб, мезбонларни олдинга олиб чиқади. Ўйиннинг сўнгги сонияларида эса Иньеста мувозанатни тиклаб, жамоасини финалга қадар олиб чиққан эди. Ваҳоланки бироз аввал Эвребе Пикенинг қўлига тўп теккан вазиятда пенальти белгиламаганди. Ўйин тизгини қўлдан чиқарган норвегиялик ҳакам ана шу ўйиндан сўнг, лондонлик мухлислар ва ОАВнинг танқиқлар «бўрони» остида қолиб кетади.
Де Блекере. “Барселона” 1–0 “Интер”(2009/10, ярим финал)
У вақтлар Жозе Моуриньо “Интер”да ишлар эди. Дастлабки ўйинда ҳакамлар Диего Милитонинг голини инобатга олмаган бўлсада, миланликлар 3–1 ҳисобида ғалаба қозонади. Жавоб баҳсида эса бельгиялик ҳакамлар Бускетснинг симуляциясига “маҳлиё бўлиб”, Тиаго Моттага қизил карточка беришади. Қолаверса, ўйин якунида Пике томонидан киритилган гол офсайддан киритилган эди. Аммо якунда бу ҳолат “Интер”ни финалдан олтб қолиш учун камлик қилган эди.
Массимо Буззака. “Барселона” 3–1 “Арсенал”(2010/11, 1/8 финал)
Лондондаги баҳсда 2–1 ҳисобида мезбонлар ғалаба қозонган эди. “Камп Ноу”даги жавоб ўйинида ҳисоб 1–1 бўлиб турган бир паллада жаноб Буззака “тўпчилар” форварди Робин ван Персини майдондан четлатади. “Сариғи” бор бўлган ван Перси офсайд қайд этилиб хуштак чалинганидан сўнг тўпни дарвозага тепади ва швейцариялик рефери унга иккинчи сариқни беради ва… Тўғри, қоида бўйича барчаси тўғри. Аммо шундай ўйинлар бўладики, қоидалар фақат ўйинни “бузишга” хизмат қилади қайсидир маънода. “Камп Ноу”да ҳам шундай бўлган эди. 10 киши бўлиб қолган “Арсенал” қолган дақиқаларда икки бор ўз дарвозасидан тўпни олиб чиқиқшга мажбур бўлади.
Вольфганг Штарк. “Реал” 0 – 2 “Барселона”(2010/11, ярим финал)
2011 йил “Эл Классико” шайдолари маза қилишган эди. Боиси, мазкур қарама-қаршиликда тўп сурадиган бу икки жамоалар ЕЧЛда ҳам рўбаро келишади. Мадридда ўтган беллашув одатдагидек, қўполликларга бой бўлди. Аммо умуман “айби йўқ” бўлган Пепе майдондан четлатилади. Тўғри, Пепени барчамиз яхши биламиз, бироқ Дани Алвес билан юзага келган ўша вазиятда Штарк нотўғри қарор қабул қилади. Алвес эса бемалол дунёнинг исталган циркида ўйнаш учун иқтидори етарли эканлигини намоён этиб, симуляция ишлатган эди. Якунда эса 10 киши бўлиб қолган “Реал” ўз дарвозасидан иккита тўп олиб чиқади.
Мавзуга оид:
- Ҳам “Барселона”, ҳам “ПСЖ”да ўйнаган 6 та энг яхши футболчи
- “Барселона” дарвозасини ЕЧЛда “илма-тешик” қилган жамоалар
- “Барселона” – “ПСЖ ” учрашувига оид 12 та факт
Шаҳзод Холбоев тайёрлади
Фикрлар