Ҳам “Ювентус”, ҳам “Милан”да ўйнаган 5 юлдуз
Эртага оқшом Италия А Сериясининг 28-турида “Ювентус” ўз майдонида азалий рақибларидан бири – “Милан”ни қабул қилади. Шаҳзод Холбоев эса бўлажак учрашув олдидан ҳар иккала жамоада ҳам тўп сурган машхур юлдузлар ҳақида ҳикоя қилади.
Златан Ибрагимович
“Милан”: 2 мавсум, 61 ўйин, 42 гол
“Ювентус”: 2 мавсум, 70 ўйин, 23 гол
2004 йилнинг 31 август куни 16 млн евро эвазига “Ювентус”га кўчиб ўтган Ибрагимович “Юве” таркибида у қадар яхши ўйин намойиш этган эмас. Шундай бўлсада, икки мавсум Туринда тўп сурган швециялик ҳужумчи “кекса синьора” сафида 23 та гол киритишга муваффақ бўлади.
2010 йил эса “Барселона”дан “Милан”га кўчиб ўтган Златан яна ўзини кўрсатишни бошлаб юборади ва клубнинг скудеттони қўлга киритишида ўзининг муносиб ҳиссасини қўшади. “Россонерилар” сафида эса Ибрагимович икки мавсум тўп суриб, 42 бор рақиблар дарвозасини ишғол этади.
Андреа Пирло
“Милан”: 9 мавсум, 284 ўйин, 32 гол
“Ювентус”: 3 мавсум, 120 ўйин, 16 гол
2001 йилнинг июль ойида 10 млн доллар эвазига “Милан”га таклиф этилган Пирло бу жамоада 9 мавсум тўп суради. Бунча вақт давомида эса 32 бор гол киритишнинг уддасидан чиққан Андреа жамоа билан кки бор скудеттони қўлга киритади ва яна шунча марта ЕЧЛда зафар қучади.
2011 йил “Ювентус” билан 3 мавсумга мўлжалланган шартномани имзолаган Пирло бу жамоа билан скудеттони қўлга киритган бўлсада, ЕЧЛда ғолиб чиқиш насиб этмайди.
Роберто Баджо
“Ювентус”: 5 мавсум, 141 ўйин, 78 гол
“Милан”: 2 мавсум, 51 ўйин, 12 гол
Баджо 1990 йилда ўша вақтларда реcорд нарҳ эвазига “Ювентус”га кўчиб ўтади. Бу ерда 5 йил тўпсурган Баджо “бьянконерилар” билан илк скудетто ва илк халқаро соврин(УEФА кубоги)ни қўлга киритган Роберто бош мураббий – Марчело Липпи билан “сан-ман”га боргани сабаб, “Милан”га юборилади. “Россонерилар” сафида икки мавсум ҳаракатланган АҚШ-94 мундиали антиқаҳрамони бу жамоа билан ҳам скудеттони қўлга киритишга эришади. Аммо Баджонинг “Милан”даги самарадорлик кўрсаткичига ҳавас қилиб бўлмайди.
Патрик Виейра
“Милан”: 1 мавсум, 2 ўйин
“Ювентус”: 1 мавсум, 38 ўйин, 5 гол
20 ёшида “Канн”дан “Милан”га таклиф этилган Виейра жамоадаги катта рақобат сабаб, “Арсенал”га ўтади.
2005 йил эса “тўпчилар” уни 13,7 млн фунт эвазига “Ювентус”га пуллашади. “Кекса синьора” сафида бир мавсум тўп сурган француз “Юве” Б Серияга тушиб кетгач, “Интер”га ўтиб кетади.
Жузеппе Меацца
“Милан”: 2 мавсум, 37 ўйин, 9 гол
“Ювентус”: 1 мавсум, 27 ўйин, 10 гол
“Интер” клуби афсонаси бўлган Меацца “Милан”да ҳам, “Ювентус”да ҳам фаолиятининг сўнггида ўйнайди. Кўр ичак соҳасидаги муаммолари сабаб, “Интер”дан кетган Жузеппе, “қизил-қоралар” сафида икки мавсум тўп суриб, 9 та гол киритишга эришади, холос. Кейинчалик эса “Юве” сафига келиб қўшилган Меацца “Милан”дагига нисбатан анча яхши ўйин намойиш этади.
Шаҳзод Холбоев тайёрлади
Фикрлар