"Аждар"дан "қирғий"га айланган Алиқулов ёхуд Ҳусниддиннинг трансфери қанчалик фойдали?

Ҳусниддин Алиқулов Туркиянинг "Ризеспор" жамоасига кўчиб ўтганидан хабарингиз бор. Хўш, бу жамоа ҳақида нималарни биламиз? Унинг тарихи ва Суперлигадаги имкониятлари ҳақидачи? Алиқуловга асосий таркиб учун жой кафолатланганми? Сизни қизиқтирган энг муҳим саволларга жавоб топишингиз мумкин.

Клуб тарихи

“Ризеспор” 1953 йилда ташкил топган бўлиб, ўтган мавсумни Туркия биринчи лигасида ўтказган. Аёвсиз кечган баҳсда Суперлига йўлланмасини қўлга киритгач, таркибини кучайтиришни бошлаб юборди. Ҳусниддин Алиқулов ўтаётган жамоага асос солганлар: Ёқуб Темизел, Атиф Тавилўғлу, Исмет Билсел, Яшар Тюмбекчиўғлу ва Муҳаррам Куйрукчи. Аввалига ярим профессионал мақомда фаолият олиб борган клуб 1968 йилдан бошлаб профессионал жамоага айланди. Туркиянинг учинчи дивизионида ҳаракатни бошлаган жамоа 1978/79 йилга келиб, биринчи лигада ғолиб чиқди. Айнан ўша йили ўз тарихида илк бор Туркия Суперлигасида дебют қилиш имконини қўлга киритди. Жамоа асосий чемпионатнинг доимий иштирокчиси эмас, бироқ доим ҳам қуйида юришга одатланмаган. Туркиянинг ўзига хос “лифт клублари”дан бири саналади. Жамоа уй ўйинларини сиғими 15 600 бўлган “Ени Ризе Шеҳир” аренасида ўтказади.

Мухлислари ўзининг кескинлиги билан ажралиб турадиган жамоани Туркияда ишқибозлари жуда кўп. Жамоа лақаби - “Қораденгиз қирғийлари”!

Вакилимиз зонасида кимлар тўп тепиши ва мураббийлар

Эмирҳан Топчи, Анил Яшар, Синан Осмонўғлу, Мусафо Шенгул ва Селим Ай “Ризеспор” жамоаси рўйхатдан ўтказган марказий ҳимоячилар. Улар орасидаги Синан Осмонўғлу ўтган мавсумни деярли асосий таркиб ҳимоясида ўтказган. Унга шерик сифатида майдон марказини бўлишган Баҳодир Озтурк эса “Антальяспор” жамоасига қайтиб кетди. Ўтган мавсумни ижара асосида "Ризеспор" сафида ўтказган футболчи кўпчиликда яхши таассурот қолдирган эди. Мавсум давомида 28 ўйинда иштирок этган ҳимоячини клуби ортга қайтаришга қарор қилди. Ҳусниддин Алиқулов эса катта эҳтимол билан Ўзтуркнинг ўрнини беркитгани амалга ошираилаётган трансфер. Сабаби, Баҳодирнинг ўйин услуби ва майдондаги функцияси Ҳусниддинники билан ўхшаш. Яъни, Алиқулов шунчаки захира ўриндиғи варианти эмас, бўшаб қолган зонани керакли кадр билан тўлдириш мақсадида амалга оширилган трансфер. Тўғри, бу терма жамоа аъзосига турклар битмас-тугаммас ишонч билдиради, дегани эмас. Майдонда ўз кучини ва имкониятларини тўлиқ намойиш этиш талаб этилади, албатта.

Ҳусниддин Алиқуловнинг трансфери

Бу трансфер борасидаги расмий маълумотлар эълон қилинди. 24 ёшли футболчи 3+1 кўринишида шартнома имзолади. Яъни у 3 йиллик келишув муддатини яна 1 йилга узайтириш ҳуқуқига эга. Деярли 2 йилдан бери Ўзбекистон Суперлигасидаги энг яхши ҳимоячи эканлигини исботлаб келаётган Алиқулов учун Туркияга йўл олгани энг идеал вариантлардан бири. Тўғри, “Насаф” мавсумнинг асосий қисмида орқа чизиқдаги тўпураридан маҳрум бўлганини ҳис қилди, бироқ Алиқуловнинг келажаги учун ҳозир бу қарор энг тўғриси ҳамдир. У профессионал футболчи ва шахс сифатида тўлиқ шаклланиб бўлган.

Боз устига, шундоқ ҳам легионерга айланишга кеч қолганини ўзи ич-ичидан сезиб турибди. Ёки ҳозир, ёки ҳеч қачон. Алиқулов жаҳон даражасида футбол намойиш этишни истаса, “Ризеспор”да асосий таркибнинг алмаштириб бўлмас футболчисига айланиши талаб этилади.

Терма жамоамиз аъзосида тезлик, жойни тўғри танлаш ва майдонни кўра билиш қобилияти яхши шаклланганини бир неча бор гувоҳига айландик. Энди ўзининг кучли жиҳатларини бошқа даражада ҳам кўрсата олиши лозим. Туркия ҳукумати томонидан ўрта осиёлик футболчилар легионер ҳисобланмаслиги эълон қилингани Алиқуловнинг фойдасига ишлаши аниқ. Туркияда легионер лимити борасидаги баҳслашув ҳали-ҳамон давом этиб келмоқда. Кимдир уни оширишни талаб қилса, бошқалар маҳаллий футболчилар етишиб чиқишига бу тўсқинлик қилади, деб ҳисоблайди. Шу боис, Суперлигадаги легионерлар доим босим остида бўлади. Алиқулов эса ҳудди маҳаллий футболчилар сингари ортиқча “давления”сиз ўз имкониятини намойиш этиши мумкин. Барчаси, унинг ўз қўлида.

Я . У