Криштиану Роналду: "Ўғлингиз учун ҳам ютишингиз шарт"

Оғир вазнда PFL чемриони Фрэнсис Нганнунинг мураббийи Эрик Никсик Ренан Феррейра устидан қозонилган ғалабада Криштиану Роналдунинг ҳам ҳиссаси борлигини айтди.

"Жанг олдидан Фрэнсис билан кийиниш хонасида эдик. Бирдан Криштиано кириб келиб, биз билан кўришди ва Нганнуга "Ғалаба қозонишингизни жуда хоҳлайман. Сизни яхши тушунаман, мен ҳам сиз каби фарзандимдан айрилганман. Лекин асло тушкинликка тушманг. Бугун ўғлингиз Колбе учун ҳам ютишингиз шарт" деган сўзларни айтиб ўтди. Роналду биз билан шундай суҳбат қурдики, уни гўё жамоамиз аъзосидек ҳис қилдим", - деди мураббий "Give Me Sport" порталига берган интервьюсида.

Эслатиб ўтамиз, 20 октябрь куни ўтказилган PFL турнирида Фрэнсис Нганну 1-раундда Ренан Феррейрани нокаутга учратди.