180 дақиқа - 1 та аниқ зарба

Бир пайтлар "Барселони"ни 8:2 ҳисобида мағлуб қилиб, ЕЧЛни қўлга киритган "Бавария"нинг бугунги ҳолати ҳавас қиларли эмас. Флик яратиб кетган машина секин-секин ишдан чиқаётгандек. Тухель эса бундан унчалик ҳам ташвишланмаяпти. 

"Бавария" ЕЧЛ доирасида "Лацио"га қарши майдонга тушиб, 0:1 ҳисобида мағлубиятга учради. Қизиқарли томони мазкур учрашувда мюнхенликлар мезбонлар дарвозаси томон битта ҳам аниқ зарба бера олмади. Бунақаси яқин 5 йил ичида кузатилмаган. Камига ўйиннинг 67-дақиқасида ҳакам Упамеканога қизил карточка кўрсатиб, римликлар фойдасига пенальти белгилади. 11 метрлик жарима зарбасини Иммобиле аниқ амалга ошириб, учрашувдаги ягона голни урди. 

Германия клуби Бундеслига доирасида бўлиб ўтган "Байер"га қарши тўқнашувда ҳам шармандали ҳолатга дуч келганди. Ўшанда "Бавария" 1 донагина аниқ зарба бера олган. 

Ўйиндан кейинги матбуот анжуманида Томас Тухель келажагидан ҳавотир олмаётганини айтди. Унинг сўзларига кўра, жамоа яхши ўнаган, лекин иккинчи таймда консентрация йўқолган. Раҳбарият эса унга ишонишда давом этади. Аммо натижалар яхшиланмаса, клуб бошқа мураббий излашга тушиши аниқ. Томас "Бавария"га келганидан кейин жамоа 10 мағлубиятини қабул қилиб олди. Бунинг учун германиялик мутахассисга 43 та ўйин керак бўлди. Таққослаш учун, Нагельсманн қўл остида жамоа 84 баҳснинг 10 тасида рақибларига таслим бўлганди.