35 ёшли Эванс "Манчестер Юнайтед"га қайтиши мумкин

Шимолий ирландиялик ҳимоячи Жонни Эванс яна "Манчестер Юнайтед"га қайтиши мумкин.

Belfast Telegraph хабарига кўра, 35 ёшли футболчи манкунианликлар клуби билан бир йиллик шартнома имзолашга яқин турибди. Қайд этилишича, Жонни Эванс мавсум олди тайёргарлик жараёнида бош мураббий Эрик тен Хагни ҳайратда қолдирган. Айтиш керакки, у ушбу вақт орасида МЮ таркибида учта ўртоқлик ўйинида иштирок этди - "Лион" (1:0), "Рехем" (1:3) ва "Боруссия Дортмунд" (2:3).

Маълумот учун, Эванс "Манчестер Юнайтед" тарбияланувчиси ҳисобланади. У 1998 йилдан 2015 йилгача клуб тизимида бўлган. У 2018 йилдан буён “Лестер”да ўйнаб келаётган эди. У 2022/23-йилги мавсум якунида “тулкилар” сафини эркин агент сифатида тарк этди.