42 yoshli Oksana Chusovitina jarohatiga qaramay JCh–2017 yo‘llanmasiga ega bo‘ldi

O‘zbekistonlik gimnastikachi, Olimpiya o‘yinlarida 7 marta ishtirok etgan yagona gimnastikachi sifatida Ginnessning rekordlar kitobiga kiritilgan afsonaviy Oksana Chusovitina Kanadaning Monreal shahrida bo‘lib o‘tgan 2017 yilgi jahon chempionati saralashidan muvaffaqiyatli o‘tdi.

42 yoshli sportchimiz tayanib sakrash bo‘yicha saralash bahslarida 14,349 ball to‘pladi va 8-o‘rinni egalladi. Bu natija uning JCh–2017 final bosqichiga chiqishi uchun etarli bo‘ldi.

Oksana Chusovitina mazkur turnirga jarohati bilan kelganini ma’lum qildi.  Bu esa uning ijobiy natija qayd etishiga to‘sqinlik qilmadi.

“Mening chiqishim qiyin bo‘lmadi, ammo mendan keyin raqobatga qo‘shiladigan sportchilar yo‘q edi. Mashqlarni bajarishdan avval biroz hayajonlandim, chunki 3 hafta oldin boldir mushaklarimni shikastlab olgandim. Har ikki oyog‘imga tushishish kerak edi va shunda final yo‘llanmasiga ega bo‘lardim. Yakunda hammasi ijobiy tugadi. Natijadan mamnunman, jahon chempionatida esa hammasi boshidan boshlanadi. Hozir o‘zim va muxlislarga quvonch ulashyapman. Mana shu dalda menga kuch va qo‘shimcha ishonch bag‘ishlaydi”, – dedi Chusovitina.