53 ёшли бош мураббий 30 метрдан гол уриб, уни сальто билан нишонлади

Руминия чемпионатининг учинчи лигасида ажойиб воқеа содир бўлди. “Брашов” жамоасининг ўйновчи мураббийи Йонел Пирву “Вииторул Онешти” жамоасига қарши учрашувни бошланғич таркибда бошлади.

53 ёшли мураббий иккинчи дақиқадаёқ ҳисобни очди. Унинг 30 метр масофадан берган зарбаси рақиб дарвозаси тўрига аниқ тушди. У голни ажойиб сальто билан нишонлади.

Бу баҳс 2:2 ҳисобида якунланди. Шу тариқа, “Брашов” жамоаси ўнинчи турга келиб, мағлубиятлари сериясига чек қўйди.

“Брашов” жамоаси бир очко билан сўнгги поғонада турибди. Бу жамоа ўнта учрашувда тўртта гол уриб, ўз дарвозасидан 38 та тўп олиб чиққан.

Йогел Пирву футболчилик даврида, яъни 1990 йиллар ўрталарида “Стяуа” сафида тўрт карра Руминия чемпиони бўлган.