Ана холос! Ёзда ПФЛда "қор ёғиб", регламентни "совуқ урибди"

Аммо спорт принципларига зид равишда 16таликнинг сўнгги мавсумини 7-ўринда тугатган "Машъал"нинг "тўрваси"ни қўлига бериб Про Лигага "бадарға қилиниши" бу йил нимадир бўлишига биринчи ишора бўлган эди. 

Ҳозир "Машъал"ни эслаб аза тутиб ўтирмоқчи эмасман аксинча ПФЛнинг "Блокнот"га айланган регламентидаги навбатдаги ўзгаришга ўз муносабатимни билдириб ўтишни жоиз деб билдим.

Аввалига, янги ном, кейин янги "формат", ундан кейин янги "формат"да янгилик... Олтига олти ва яна бир нималар ўйлаб топилди, "Олтин очко" тизими ишлаб чиқилди. Унга кўра, 3-даврада Суперлигада иккига ажралиш бўлиши ва юқори олтиликдаги жамоаларнинг жон сақловчилар гуруҳидаги клубларга қарши ўйинлардаги, шунга мос равишда қуйи олтиликдагиларнинг чемпионлик учун курашувчилар билан ўзаро ўйинидаги очколари ҳам нолга тенгланиши керак эди, Аммо, куни кеча Twitter'да 21-тур арафасида ПФЛ томонидан ишлаб чиқилган регламентни "совуқ урганлиги" тўғрисидаги далилга асосланган хабарлар тарқалиб кетди.

Унда ПФЛ бош директори Омон Ғофуров номидан клублар раҳбарларига ёзилган ҳамда ПФЛ раҳбари имзоси қўйилган, регламентни ўзгартириш тўғрисидаги хат битилган эди. Хатда шундай дейилади:

-Мавсум бошида шароитдан келиб чиқиб, 2018-йилги чемпионатимиз тартиб-қоидаларини белгиладик. Унга кўра, халқаро талабларга жавоб бериш нуқтаи-назаридан келиб чиқиб, Суперлига жамоаларини аниқлаб олдик ва икки босқичли мусобақа тартибини ишлаб чиқдик.

Жамоаларнинг деярли бари мавсум бошидан кучли олтиликка интилиб келди, чемпионатда белгиланган "олтин очко" қоидаси қайсидир маънода келишилган ўйинларнинг вужудга келиши авж олмоқда, бу эса клубларнинг кейинги фаолитига таъсир кўрсатиши ҳамда чемпионатнинг савиясига таъсир кўрсатиши аниқ.

Шундан келиб чиқиб, Суперлига жадвали регламентда белгиланган пунктларга асосланиб жадвал ўзгартирилиши, яъни, "Олтин очко" қоидаси олиб ташланиши борасида таклиф ва фикрларингизни жорий йилнинг 7 август соат 11:00 гача кечиктирмасдан ПФЛ электрон почтасига юборишингизни сўраймиз.

photo_2018-08-07_02-29-12

Энди савол туғилади: Нега ПФЛ "Олтин очко" қоидасини киритаётганда бу каби ҳолатларга эътибор қилмади? Ахир барчамиз ўзбек футболида келишилган ўйинлар кўп учраб туришини билганмиз-ку. Нега айнан бўлинишга икки тур қолганида регламентга ўзгартириш киритгилари келиб қолди? 

Аввлига, клублар раҳбарларини маошига аралашиш, кейин регламентни ўзгартириш... 

Ўтган ҳафтада сайтимиз томонидан ҳафталик бериб бориладиган "Sports.uz Ҳафтаси" кўрсатуви меҳмони бўлган, ПФЛ бош директори ўринбосари - Диёр Имомхўжаев регламент борасида умуман бошқача гапирган эди:

- Нега энди чемпионлик учун курашмайдиган жамоалар кучлилар орасига кириб интригани синдиришлари керак, бемақсад жамоа нима қилади, "ўйинни беради" ... мазмунидаги фикрларни билдириб ўтган эди (Видео):



Буёғига ПФЛнинг жавобини кутамиз, хулоса қилиш эса ўзингиздан.

Азамат УМАРОВ

Фикрлар

Фикр қолдириш учун авторизациядан ўтинг!
Sports.uz tahririyati
07/08/2018 03:14
Biz bilgqndik, biz ishongandik