«Арсенал» ярим ҳимояси энг кучлими?

Бир вақтлар Премьер Лиганинг энг кучли ярим ҳимоя чизиғи «Арсенал»ники эди. Энди эса Унай Эмери қўли остида янги шаклланаётган «тўпчилар» ярим ҳимояси яна қайта кучайиб бормоқда. «Арсенал»нинг «олтин даври»даги ярим ҳимояси бугунги кунда яна қайтаётгандек, гўё. Аслида ҳам шундайми? Бундай дейишга қандай асосларимиз бор? Қуйидаги таҳлилимиз ана шу ҳақида.

Патрик Виейра ва Жильберто Сильва номлари «Арсенал»нинг «енгилмас жамоа» бўлган мавсумида барча шон-шуҳрат билан синоним сўзга айланиб кетганди. Бироқ Арсен Венгернинг Лондон шимолидаги ҳокимияти ҳам айнан клуб ярим ҳимоясининг сўниши билан барҳам топганди.

Бироқ бу йил ёзида клуб айнан мана шу чизиқ бўйича катта ишлар олиб борди ва янги бош мураббий Эмери қўлида анча мувозантга тушган ва кучли ярим ҳимоячилардан иборат.

Лондонликларнинг ярим ҳимоядаги кучини «Ливерпуль»га қарши ўйинда ҳам яққол кўрдик. Ҳисоб 1-1 билан тугаган бўлсада, «тўпчилар»нинг ярим ҳимоя чизиғи бутун ўйин давомида ўйинга ўз ҳукмини ўтказди.

Бундан кўриниб турибдики, Виейра ва Жильберто кетганидан кейин “тўпчилар” ярим ҳиомясида испанча революция амалга оширилмоқда. Буни қайси жабҳаларда кўрамиз?

Мувозанат ва ҳимоя

Ўтган мавсум Венгер асосан тажрибалар ва турли комбинациялар билан ўтди. Франциялик мутахассис ярим ҳимояни икки ва уч кишилик футболчилар билан алмаштириб турди. Бир ҳафта Муҳаммад Элнени, Гранит Джака ва Джек Уильширлар ўйнаса кейинги сафар Аарон Ремзи ва Джакалар ўйнарди. Бу эса албатта ўзаро ҳамкорликнинг шаклланишига жиддий таъсир қиларди.

Эмери эса бир неча тажрибалар ўтказганига қарамай таянч ярим ҳимоясини икки кишилик тактикада шакллантирмоқда ва бу вазифаларга Джака, Маттео Гендузи ва Лукас Торрейралар рақобат қилмоқда.

Бу ҳар ҳафта янгидан янги вазифаларга киришгандан кўра, ўтиш даврини тезлаштирган маъқул эканлигини исботламоқда.

Икки кишилик таянч нуқтаси жамоанинг ярим ҳимоясига биргаликда жавобгар бўлишни, ўйин темпига таъсир қилишни ва яратувчан футболчиларга олға бориш имкониятини туғдирмоқда. Бу Месут Ўзилнинг энг яхши ўйинини намойиш қилишига шароит яратиб бермоқда.

Джака ва Торрейралар орқали «Арсенал» кучли ярим ҳимоя комбинациясига эга. Улар тўпга эгалик қилганда Ўзилни излаши ва унга тўп етказиб бериши орқали жамоанинг ўйини борган сари очилиб бормоқда.

Ярим ҳимояда бундай мувозанатнинг ўрнатилиши таянч ярим ҳимоячиларининг статистикасида яққол кўзга ташланмоқда. Джака (73) ва Торрейра (68) рақибдан тўпни олиб қўйиш борасида ҳатто Поль Погба ва Жоржиньоларни ҳам ортда қолдиришмоқда.

Тўпга эгалик қилиш руҳияти

Юрген Клопп ва Пеп Гвардиолаларнинг Премьер Лигага олиб кирган «қайта қурилиш» кучи анча сезиларли бўлди. Буни ҳаммадан кўпроқ «Арсенал» яхши тушунади. Ўтган мавсумда улар «Ливерпуль» ва «Манчестер Сити»дан нақ 13 гол ўтказиб юборишди.

Янги мавсумда эса улар ушбу жамоаларга қарши икки ўйинда атиги учта гол ўтказиб юборишди. Рақамлардаги катта фарқни сезяпсизми? Боиси испаниялик мураббий ҳам тўп назоратига жиддий эътибор қаратмоқда.

Ўтган турда «Арсенал» «Ливерпуль»га қарши баҳсда 61.8 % лик ўйин назоратига эга бўлган. Узатмалар кўрсаткичи 758-563 лондонликлар фойдасига.

«Арсенал»да авваллари биз кўрмаган уйғунликни Джака ва Торрейра ҳамкорлиги бермоқда. тўпга эгалик қилишда айнан шу икки футболчиларнинг саъйи-ҳаракатлари юқори бўлмоқда.

Фақатгина Жоржиньо (1237) Джака (1060)дан кўпроқ тўп билан муомала қилган ва узатмалари сони (1136) швейцариялик ярим ҳимоячиникидан (857) кўп. Бироқ Джаканинг узатмалари ўтган мавсумдагига қараганда анча яхшиланган.

Ўзаро боғлиқлик

Эмерининг Лондондаги қисқа муддат ичида амалга оширган энг муҳим ишларидан бири бу Премьер Лига талабларига тезда мослашиб кетиши бўлди. Баъзи мураббийлар бунинг уддасидан чиқа олмаган бўлса, Гвардиолага ўхшаганларга озгина вақт керак бўлган.

Бироқ «ПСЖ»нинг собиқ мураббийи янги клуби билан ажойиб стартни бошлашга муваффақ бўлди. Унга Джака каби ўтган мавсумда Премьер Лиганинг барча учрашувида майдонга тушган футболчининг ёрдам катта бўлди.

Кўп танқидларга учраган бўлсада, Торрейра каби шерикнинг ярим ҳимояда пайдо бўлиши унга куч бағишламоқда ва ўз ўйинини анча кучайтириб бормоқда. Олдингидек довдираб қолишлар кам, хатолар кам.

«Арсенал» ниҳоят ярим ҳимоя билан боғлиқ муаммоларни бартараф қилган кўринади, Торрейра ўзининг тажовузкор ҳаракатлари билан Джаканинг рақиб эшигининг очишига шароит яратмоқда. Икковлон биргаликда эса рақиб ҳимоясини бузиб ўтишда кам қийинчиликка учрамоқда.

Умумий натижа эса клубнинг ўйинларига ижобий таъсир қилмоқда. Бекорга улар 14 ўйиндан бери мағлубият нималигини билмай келаётгани йўқ. Испаниялик стратег жамоанинг муҳим қисми – таянч ярим ҳимоясидаги камчиликларни тузатиб олишга эришган.