Энг кучли стол теннисчиларимиз Тошкентда беллашади

Ўзбекистон Республикаси жисмоний тарбия ва спорт вазирлиги, Миллий олимпия қўмитаси ҳамда мамлакатимиз стол тенниси федерацияси томонидан пойтахтимизда стол тенниси бўйича Ўзбекистон чемпионати ўтказилди.

Чемпионатда Тошкент шаҳри, Андижон, Фарғона, Наманган, Сирдарё, Жиззах, Хоразм, Самарқанд, Навоий, Қашқадарё, Сурхандарё ва Тошкент вилоятлари, Қорақалпоғисто Республикасидан келган 150 нафарга яқин спортчи иштирок этди.

– Ўзбекистон чемпионатини терма жамоага янги истеъдодаларни аниқлаш, мамлакатимизда стол теннисини янада оммалаштириш ва келгуси мавсумда терма жамоамиз сафида иштирок этадиган спортчиларни аниқлаш мақсадида ўтказдик, – дейди Ўзбекситон стол тенниси федерацияси раиси Саида Маҳмудова. – Жорий йилги мавсум ҳам якунланди. Энди биз янги мавсумга тайёргарликни бошлаймиз.

Мусобақанинг эркаклар ўртасидаги яккалик баҳсларида Зоҳид Кенжаев, Элмурод Холиқов, Қутбидилло Тешабоев ва Станислав Тян шоҳсупага кўтарилди.

Аёллар баҳсида эса Римма Гуфранова, Розалина Хожиева, Меҳринисо Норқулова ҳамда Камила Холиқова ғолиб ва совриндорлар қаторидан жой олди.

Ўзбекистон чемпионатининг жуфтлик баҳсларида Зоҳид Кенжаев ва Станислав Тян тандеми олтин медални қўлга киритган бўлса, аёллар ўртасида Римма Гуфранова ҳамда Розалина Хожиева тенг келадигани топилмади.

Мусобақанинг аралаш беллашувларида З.Кенжаев ва М.Магдиева дуети биринчи поғонадан жой олди.

Чемпионат якунида ғолиб ва совриндорлар ташкилотчилар томонидан муносиб тақдирланди.