Испан ОАВлари: Роналду "Эл-класико"ни ўтказиб юбориши мумкин

Мадриднинг “Реал” клуби ҳужумчиси Криштиану Роналду бугун жамоанинг умумий гуруҳидан ажралган ҳолда, индивидуал тарзда шуғулланди. Бу ҳақда Football Espana нашри хабар тарқатмоқда.

Берилган маълумотларга қараганда 32 ёшли португалиялик футболчи 16 декабрь куни “Гремио” клубига қарши бўлиб ўтган клублар ўртасидаги жаҳон чемпионати финалидан сўнг мушакларида бироз толиқиш сезган ва ўзини ноқулай ҳис қила бошлаган.

Бир қатор испан ОАВлари Роналдунинг индивидуал тарзда шуғулланаётгани унинг “Эл-класико”да иштирок этиши сўроқ остида қолиши мумкинлигидан далолат деб баҳолашмоқда.

Маълумот учун, “Реал” ҳамда “Барселона” жамоалари ўртасидаги бахс 23 декабрь куни Тошкент вақти билан соат 17:00да старт олади.