Асрор Алиқулов Қўқондаги йирик ғалаба, қачон Муборакдаги аренага қайтиши ва жамоасининг топ ҳужумчиси ҳақида

Суперлиганинг 12-турида Муборакнинг “Машъал” жамоаси сафарда “Қўқон-1912”га қарши майдонга тушди.

Ўйин меҳмонларнинг тезкор голи билан бошланди. Бу эса “Машъал”га қўл келди ва беллашувни кутилмаганда 0:4 ҳисобида фойдасига ҳал қилди.

Учрашувдан сўнг “Машаъл” бош мураббийи Асрор Алиқулов фикрлари билан ўртоқлашди.

- Қўқон жамоаси ўз уйида тажовузкор ўйин кўрсатади, охиригача курашадиган жамоа. Кўпроқ қарши ҳужумда ҳаракат қилади. Тезкор гол урдик, аммо шундан кейин бироз сустлашдик. Оддий ҳолатларда тўп йўқотдик. Бу эса “Қўқон-1912” жамоасига ҳужумларини бошлашда қўл келарди. Шу боис йигитларга уқтиргандик, барибир ҳаяжон бўлади. Иккинчи голдан кейин футболчиларимиздаги босим йўқолди ва йирик ҳисобда ғалаба қозондик. Жамоамиз ғалабани узоқ йўл босиб келган мухлисларимиз ёнида нишонладилар. Меҳнатлари учун ўйинчиларимизга миннатдорлик билдираман.

- Мавсум давомида “Машъал” доим меҳмон сифатида ўйнамоқда. Билишимча, Муборакдаги стадионда ишлар олиб борилмаяпти. Бу нима билан боғлиқ? “Машъал” қачон ўз уйига қайтади?

- Иш олиб борилмаяпти десак нотўғри бўлади, иш олиб борилмоқда. Кўпроқ муаммо – бу чим билан боғлиқ. Ёритиш тизимлари ўрнатилган. Чим алмашиши керак, таъмирлаш ишлари давом этяпти. ВАР ҳамда суғориш ишлари бўйича ҳам ишлар олиб бориляпти. Жамоани шунга тайёрлаяпмиз. Биз меҳмонда ўйнашга мажбурмиз. Футболчиларга кўп босим қилмаяпмиз. Асосий эътиборни жамоавий ўйинга қаратганмиз. Ҳозирча бизнинг уй майдонимиз “Шўртан”нинг стадиони. Шунинг учун бир хил ҳолатда.

- Хумоюн Муртазоев иккинчи ёшлигини ўтказяптимикин? Ҳозирги вазиятда ҳужумчилар муаммоси бўлиб турган ҳолатда “Машъал” топ ҳужумчисига эга. Битта вазият ва битта гол...

- Машғулотлар жараёнида кўп меҳнат қиляпти. Шунинг эвазига ҳам сермаҳсуллик бор. Ўтган йилгига нисбатан анча енгил, жойидан қўзғалиши, курашувчанлиги, атлетизм томонлама ҳам фаоллиги ошган. Барчаси машғулотлардаги қилаётган меҳнатларининг эвазига деб биламан.

- Сардор Абдураимов иккинчи бўлимда ўйинларга қўшиляпти. Асосий таркибда тушишига нима халақит беряпти?

- Бу кўпроқ “Қўқон-1912” жамоасининг ўйинидан келиб чиқиб. Чунки ҳимояланади. Бизга биринчи бўлимда курашувчан футболчилар керак эди. Шунинг учун Сардорни иккинчи бўлимга олиб қолдик. У яхши фикрлайдиган ўйинчи ва тўп билан ҳам яхши муомала қилади. Ҳимояда озгина муаммолар бор. Ўйлайманки, Абдураимовни иккинчи бўлимга қолдирган қароримиз ўзини оқлади. Сардор ҳужумларда ўзини кўрсата олди, яхши ҳаракат қилди.