Жаҳон чемпиони бўлган мураббий Аббосбек Файзуллаевга устозлик қилиши мумкин

Москованинг ЦСКА клуби италиялик мутахассис Фабио Каннаварони бош мураббий сифатида таклиф қилиш ниятида. Бу ҳақда машҳур журналист Жанлука Ди Марцио хабар берди.

Маълумотларга кўра, 51 ёшли мураббийнинг хизматларига шахсан клуб президенти Евгений Гинер катта қизиқиш билдирмоқда.

Каннаваро сўнгги марта Хорватиянинг "Динамо Загреб" клубини бошқарган. У декабрь ойида тайинланган, аммо 2025 йил апрель ойида лавозимидан озод этилган. У бош мураббийликни тарк этган пайтда жамоа чемпионатда 3-ўринда эди ва мавсум якунига келиб 2-поғонани эгаллаб, "Ријека"га очколар тенг бўлишига қарамай, шахсий учрашувларда ютқазгани учун чемпионликни бой берган.

Фабио Каннаваро аввалроқ "Удинезе", "Беневенто" (Италия), "Ан-Наср" (Саудия), "Гуанчжоу" ва "Тяньцзинь" (Хитой) клубларида мураббий сифатида фаолият юритган.

ЦСКА эса бош мураббий Марко Николич жамоани тарк этганидан сўнг янги мутахассис излашни бошлаган. Каннаваронинг келиш эҳтимоли клубнинг келажак режаларида катта ўзгаришларга олиб келиши мумкин.