Легионерлар. Турсунбой Хусанов: Жорий мавсумда олдимизга чемпионлик вазифаси қўйилди

Ўткан мавсумнинг биринчи ярмини “Андижон”да ўтказган футболчи ёзда Қирғизистон чемпионати иштирокчиси бўлгган “Алга” футбол клубига кўчиб ўтганди. Айни дамда легионер мақомини олган Турсунбой Ҳусанов янги мавсумга жамоа сафида астойдил тайёргарлик кўрмоқда. Яқинда ҳамюртимиз боғланиб, чемпионат олдидан фикрлари билан қизиқдик.  

- Қирғизистон чемпионати мен учун бегона эмас. Боиси “Андижон”га боришдан аввал ҳам бу ерда ўйнаганман. Билсангиз керак, Қирғизистон олий лигасида 7та жамоа иштирок этади. Чемпионат эса тўрт даврадан иборат бўлади. Бу ерда ҳам савия йилдан йилга ошиб бормоқда дейиш мумкин. Бақувват хомийларга эга бўлган жамоалар ҳам талайгина. Жамоам “Алга”га келадиган бўлсак, бу ерда раҳбарият томонидан қулай шароитлар яратилган. Нолишга хожат йўқ. Фақат ўйнаш керак холос.  

- 11 мартдан мусобақага старт берилади. Жорий мавсум раҳбарият томонидан олдимизга чемпионлик вазифаси қўйилган. Шунга монанд тайёргарлик кўрилмоқда. Қишда Туркияга  сафар уюштириб, қулай шароитларда йиғин ўтказиб қайтдик. Шунингдек Бангладешда Шайх Камол хотирасига бағишлаб ўтказилган турнирда иштирок этиб, 8та жамоа ичида 3-ўринни эгалладик. Ушбу мусобақада биздан ташқари бошқа мамлакат жамоалари ҳам иштирок этганини айтиб ўтишим керак. Турнир жуда фойдали бўлди.

 
- Ўтган йили Қирғизистонда “Дордой” чемпион бўлганди. “Алга” эса бронза медалларини қўлга киритганди. Менимча бу йил олтин медаллар учун кураш “Дордой”, “Олой” ва “Алга” ўртасида кечади. ОФК Кубогида иштирок этиш учун йўлланмани қўлга киритмоқчимиз.  

- Бу ерда яна бир ўзбекистонлик футболчи Тимур Султонов ҳам фаолият юритмоқда. Тажрибали ҳимоячи жамоамизнинг сардори ҳисобланади.  

- Яқинда яна бир андижонлик футболчи Алишер Тўхтасиновнинг “Нефтчи” кубига ўтганини эшитдим. Жалолобод нинг  “Нефтчи” жамоаси сафида 2010 йил тўп сурганман ва ўша мавсумда биз чемпионликка эришганмиз. Ўткан йили жамоа яна кучлилар сафига қайтди. Алишерга янги мавсумда омад тилаб қоламан.