Шомуродовнинг трансфери энг қиммати бўлиб чиқди!

Айни пайтда футбол жамоатчилигининг эътибори трансфер бозорига қаратилган. Янги мавсум олдидан жамоалар ўз таркибларини тартибга солишга алоҳида эътибор қаратмоқда.

Ёзги трансферлар бозори пайтида Ўзбекистон миллий терма жамоаси сардори ва энг зўр тўпурари Элдор Шомуродовнинг номи ҳам одатдагидан кўпроқ тилга олина бошланди. Бу кўп жиҳатдан легионеримиз ўйнаётган “Рома”да бош мураббий алишгани билан боғлиқ.

Бундан ташқари, мавсумнинг иккинчи ярмини юқори даражада ўтказган ҳужумчимизнинг бозори қайнаши табиий ҳол сифатида қабул қилиняпти. АҚШдан келган таклиф ортидан Шомуродов учун курашга Туркиянинг “Башакшеҳир”, Франциянинг “Ренн” ва Италиянинг “Кремонезе” каби клублари ҳам қўшилди ва уларнинг аксарияти римликлар билан музокараларни давом эттирмоқда.

Бу орада нуфузли манбалардан бири – 161.ru сайти Россия Премьер-лигаси вакили “Ростов” клубининг энг қиммат трансфери рейтингини тузиб чиқди. Унга кўра, ростовликлар ўз тарихида энг катта даромадни Элдор Шомуродов трансферидан олгани маълум бўлди.

Sports.uz портали легионеримиз фаолиятида муҳим роль ўйнаган “Ростов” клубининг энг қиммат ўн битта трансфери ҳақида маълумот беришга қарор қилди.

Элдор Шомуродов (“Ростов”дан “Женоа”га – 9,5 миллион евро, 2020 йил)

Ўзбекистонда “Машъал” ва “Бунёдкор”да тўп тепган ҳужумчини Россия Премьер-лигасида иштирок этаётган “Ростов” 2017 йилнинг 15 июлида ўз сафига қўшиб олади. Бу трансфер учун ростовликлар  “Бунёдкор”га 300 минг евро тўлагани қайд этилган.

Элдорнинг “Ростов”даги фаолияти давомида 2019-2020 йилги мавсум алоҳида аҳамият касб этади. Ҳужумчи ростовликлар таркибида 12 та учрашувда ўнта тўп киритади, жамоа Европа Чемпионлар лигасига чиқиш учун охиригача курашади, бироқ буни уддалай олмай, Европа лигаси йўлланмаси билан чекланади. Шомуродов эса, хориж клублари назарига тушади.

“Ростов”да уч йил давомида ўйнаган ҳамюртимиз 91 та ўйинда рақиблар дарвозасини 18 марта ишғол қилади ва жамоадошларига 12 та голли пас узатади.

2020 йилнинг октябрида Италиянинг энг қадимий клуби “Женоа” Шомуродовни ўз сафига қўшиб олди. Аввалига генуяликлар 7,5 миллион евро тўлаб, трансферни ижобий ҳал қилди. Кейинчалик турли бонуслар билан бу сумма 9,5 миллион еврога кўтарилди. Айнан мана шу кўрсаткич “Ростов”нинг энг катта чиқиш трансфери бўлиб турибди.

Элдор Италиядаги дебют мавсумида генуяликлар жамоасида А Серия ва мамлакат кубогида жами 32 та баҳсда ўз ҳисобига саккизта гол ва иккита ассист расмийлаштиради. “Женоа” бир неча ойдан кейин “Рома” таклифини қабул қилиб, ўзбек ҳужумчиси учун сарфлаган 9,5 миллион еврони қайтариб олишдан ташқари, яна 10 миллион евро даромад кўради. Пойтахтликлар ўзбек форварди учун бонуслар билан бирга 19,6 миллион евро сарфлаган.

2024-2025 йилги мавсум эса, Элдор Шомуродовнинг “Рома”даги фаолиятида энг зўр давр бўлди. Чемпионатнинг иккинчи ярмида “бўрилар”нинг етакчиларидан бирига айланган ўзбек футболчиси миллий терма жамоа билан бирга 2026 йилги жаҳон чемпионатига ҳам йўлланма олди.

“Ростов”нинг қолган энг қиммат ўнта трансфери қуйидагича кўриниш олган:

Данил Глебов ( “Ростов”дан “Динамо Москва”га, 8 миллион евро, 2025 йил);

Миха Мевля (“Ростов”дан “Зенит”га, 8 миллион евро, 2017 йил);

Баштуш (“Ростов”дан “Лацио”га, 6,5 миллион евро, 2016 йил);

Дмитрий Скопинцев (“Ростов”дан “Краснодар”га, 4,4 миллион евро, 2019 йил);

Сверрир Ингасон (“Ростов”дан “ПАОК”га,  4 миллион евро, 2019 йил);

Резиуан Мирзов (“Ростов”дан “Спартак Москва”га, 4 миллион евро, 2019 йил);

Алексей Ионов (“Ростов”дан “Краснодар”га, 3,5 миллион евро, 2020 йил);

Дмитрий Чистяков (“Ростов”дан “Зенит”га, 3,25 миллион евро, 2021 йил);

Евгений Чернов (“Ростов”дан “Краснодар”га, 3 миллион евро, 2020 йил);

Матиас Норманн (“Ростов”дан “Ар-Раэд”, 3 миллион евро, 2023 йил).

Ҳусанов кўз ўнгида “Манчестер Сити” тарихий рекорд ўрнатди

Тезкор: Италия клуби Шомуродов трансферига муносабат билдирди!

Шомуродов кучайиб кетди...

Роналду Машариповга: Нима, сен Мессининг мухлисимисан?!

Легионеримиз Европада юриш қилишга тайёр!