“Ливерпуль”, ранжима, кетмасам бўлмайди!

Англия Премьер-лигасининг амалдаги чемпиони “Ливерпуль” шарафини ҳимоя қилиб келаётган муҳим ўйинчилардан Иброҳим Конате жамоани тарк этиш бўйича якуний қарорга келди.

Footmercato нашри тарқатган маълумотга кўра, марказий ҳимоячи клуб билан тузилган ва 2026 йилнинг ёзигача давом этиши белгиланган шартномани узайтиришни истамади.

Франциялик футболчи янги чақирув ва синовларга тайёрлигини билдирди. “Ливерпуль” ва Конате ўртасидаги музокаралар натижасини бир неча қудратли клублар диққат билан кузатиб борди. Уларни 26 ёшли футболчини келаси ёз бепул қўлга киритиш имконияти қизиқтирмоқда.

Иброҳим Конатени анчадан бери “Реал” кузатиб келмоқда ва улар ўйинчига Англия клуби билан янги битим тузмасликни тавсия қилган. “Қироллик клуби” худди шу усулни “Ливерпуль”нинг бошқа вакили Трент Александер-Арнольдга нисбатан қўллаб, ниҳоят шу ёз ўнг қанот ҳимоячисини эркин агент сифатида қўлга киритди.

Иброҳим Конатега мадридликлардан ташқари “Барселона” ва “Пари Сен-Жермен” каби қудратли клублар ҳам кўз тикмоқда.

2021 йилдан бери ливерпулликлар таркибида ўйнаб келаётган футболчи Transfermarkt портали экспертлари томонидан 60 миллион еврога баҳоланган.