Поветкин ўзига янги рақиб топди

Россиялик оғир вазнли боксчи Александр Поветкин навбатдаги жангини ёзда британиялик Диллиан Уайтга қарши ўтказади. Бу ҳақда The Mirror нашри хабар бермоқда.

– Мен унга (Поветкинга – “SPORTS.uz”) июнда бошқа боксчи билан жанг қилишни таклиф қилдим. Агар у хоҳласа, бу Диллиан Уайт бўлади, – дейди промоутер Эдди Хирн.

Уайт ҳам ўз навбатида Поветкин билан рингда учрашишга тайёрлигини маълум қилган. Хирннинг сўзларига кўра, айни дамда россиялик спортчи Энтони Жошуа эгалик қилаётган Бутунжаҳон бокс ассоциацияси (WBA) камарига асосий даъвогар бўлиб турибди.

Аввалроқ Поветкиннинг промоутери Андрей Рябинский кузда Жошуа билан жанг бўлиши мумкинлигини таъкидлаган эди. Бироқ ҳозирча якуний бир қарорга келинмаган.

Ўтган ҳафта Поветкин Дэвид Прайсни мағлуб қилди. Унинг ҳисобида профессионал боксда 34 ғалаба (24 нокаут) ва 1 мағлубият бор бўлса, Уайт фаолияти давомида 24 жанг ўтказиб, 23 тасида зафар қучган (17 нокаут).