Про-лига чемпионлиги ҳал бўладиган "Андижон" - "Истиқлол" учрашувига кириш бепул

Хабарингиз бор, 13 ноябрь, сешанба куни Про-лиганинг 35-тур ўйинлари бўлиб ўтади.

Турнинг марказий учрашуви шубҳасиз «Андижон» - «Истиқлол» қарама-қаршилиги бўлади. Шу куни «бургутлар» ғалаба қозонса, муддатидан аввал чемпион бўлиб, Суперлига йўлланмасини қўлга киритади.

Клуб матбуот хизмати тарқатган хабарга кўра бўлажак учрашувга бўлган қизиқиш юқори эканлигини инобатга олиб, ташкилий ишлар бўйича тайёргарлик авжига чиқиб бормоқда. «Соғлом авлод» стадионида кечадиган учрашувга кириш мутлақо бепул этиб белгиланган. Ўйиндан аввал концерт дастури ҳам ўтказилиши режалаштирилмоқда. Қолаверса бу йилги чемпионатнинг Андижондаги сўнгги ўйини бўлгани учун мухлисларга ҳам бир қатор эсталик совғалар ҳозирланмоқда. Суперлига йўлланмасини қўлга киритиш учун бутун мавсум давомида тун-у кун мехнат қилган раҳбарият, мураббийлар штаби, футболчилар ва барча ишчи ходимларни ажойиб бонуслар кутиб турибди. Жамоа аъзоларини шахсан Андижон вилояти ҳокими Шуҳратбек Абдураҳмоновнинг ўзи тақдирлаши кутилмоқда.

Маълумот учун, «Андижон» - «Истиқлол» ўйини 13 ноябр куни, «Соғлом авлод» стадионида соат 14:30 да бошланади.