Суннатилла Эрматов: Андижонликларнинг футболга бўлган меҳри умуман бошқача экан

Аввал хабар берганимиздек бугун ўз майдонида “Истиқлол”ни енган “Андижон” мавсум якунланишига бир тур қолганида Про-лига чемпионлигини қўлга киритди.

Учрашувдан сўнг “бургутлар” ярим ҳимоячиси Суннатилла Эрматов SPORTS.uz муҳбирига мавсум ҳақида ўзининг қисқача фикрларини билдириб ўтди.

- Андижон"нинг мавсумни биринчи ўринда якунлашида энг муҳим омил нима бўлди?

- Биринчи навбатда бу жамоадагиларнинг ҳамжиҳатлиги, ҳар қандай вазиятда бир-бирини қўллаб-қувватлаши билан боғлиқ. Аҳир айтишадику “Куч – бирликда” деб.

- Бу мавсум қайси жамоалар яна Суперлигага чиқишга муносиб эди?

- Ҳеч кимга сир эмаски авваллари қуйи лигада 1 ёки 2 жамоа юқори лигага кўтарилиш учун кураш олиб борарди. Аммо, бу йилги Про-лига баҳсларида 4-5 жамоа Суперлигага чиқишни мақсад қилган эди, шу боис ҳам барча ўйинлар шиддатли ва муросасиз кечди. Менимча Самарқанднинг “Динамо” клуби ҳам Суперлигага чиқишга лойиқ эди. Чунки, ушбу жамоа жуда тартибли ва савияли футбол намойиш этди. Қолаверса, таркибида маҳоратли футболчилар жуда кўп.

- Андижонлик мухлислар ҳақида фикрингиз?

- Футболни бу қадар севадиган мухлисларни биринчи кўришим. Андижонликларнинг футболга бўлган меҳри умуман бошқача экан. Айниқса Нодир Тўйчиев бошчилигидаги мухлислар гуруҳи ҳар бир ўйинда бизни қўллаб-қувватлаб турди. Ушбу натижаларда мухлисларнинг ҳам ҳиссаси бор деб ўйлайман. Энди Суперлигада ҳам уларга мана шундай ғалабаларни тақдим этишга ҳаракат қиламиз.

- "Машъал"га қарши ўйин энди аҳамиятсиз. Бу "Андижон" футболчиларини хотиржамликка берилишига олиб келмайдими?

- Озроқ хотиржамлик бўлиши мумкин. Лекин биз профессионал футболчилармиз ва шу боис ҳам бор кучимиз билан ҳаракат қиламиз. Қолаверса, чемпион номига муносиб бўлиш учун ҳам Муборакда ғалаба қозонмоқчимиз. Мавсумни чиройли ғалаба билан якунлашни мақсад қилганмиз.

Бахтиёр ТОШТЕМИРОВ суҳбатлашди.