Аббосбек Файзуллаев: Мақсадим - "Барселона"да ўйнаш, лекин "Реал"дан таклиф тушса...

Ўзбекистон миллий терма жамоаси ва Москванинг ЦСКА клуби ҳужумкор ярим ҳимоячиси Аббосбек Файзуллаев PulNews YouTube каналига берган интервьюсида ёқтирган футболчиси ва клуби ҳақидаги саволга жавоб берди.

-Месси ёки Роналду?

-Ўйин жиҳатидан Месси, характер жиҳатидан Роналду кўпроқ ёқади.

-“Барселона” ёки “Реал”?

-“Барселона”. Чунки бу жамоанинг ўйинларини кўп кўрганман.

-Марказий Осиёдаги энг қиммат футболчисиз. Қайси жамоада тўп суришни орзу қиласиз?

-Мақсадим, Европанинг кучли бешлик чемпионатларидан бирида топ жамоада ўйнаш. Асосий мақсадим “Барселона”да тўп тепиш. Агар “Реал”дан таклиф тушса, албатта ўтардим (кулади).

Эслатиб ўтамиз, 20 ёшли ҳужумкор футболчимизнинг айни дамдаги трансфер нархи 6 миллион еврони ташкил қилмоқда. Шу тариқа, Ўзбекистон миллий терма жамоаси футболчиси Аббосбек Файзуллаев биринчи маротаба Марказий Осиёнинг энг қимматбаҳо ўйинчисига айланди.