Менга нисбатан ҳурматсизликни тўхтатинг! Ўзбекистонлик боксчи WBAдаги титул жанги учун гонораридан воз кечди

Жаҳон боксидаги нуфузли WBA версияси бўйича жаҳон чемпиони унвонига мажбурий даъвогар ҳисобланган ўзбекистонлик боксчи Бектемир Мелиқўзиев Жаҳон бокс ассоциацияси ва ўз вазн тоифасидаги амалдаги чемпион Хайме Мунгияга очиқ мурожаат йўллади.

- Мен учун гонорар муҳим эмас, керак бўлса, текинга ҳам жанг қилишга тайёрман. Лекин илтимос, менга ва ушбу спорт тури қоидаларига нисбатан ҳурматсизликни тўхтатинг!

Хайме Мунгия, мен сен унвон учун жанг қилганингдан анча олдин мажбурий даъвогар сифатида рўйхатда эдим. Сен чемпион бўлдинг — мен сен ёки бошқа ҳар қандай чемпионни қандай ҳурмат қилган бўлсам, энди мени худди шундай ҳурмат қил.

WBAни ҳурмат қил, мухлисларни ҳурмат қил. Улар ҳақиқий рақобат бўладиган, натижаси олдиндан аниқ бўлмаган ҳақиқий жангни кўришни хоҳлашади, олдиндан натижаси маълум бўлган учрашув эмас!, — деб ёзган ўзбекистонлик боксчи ўзининг инстаграм саҳифасида.

Маълумотларга кўра, Мелиқўзиев бир йилдан ортиқ вақт давомида WBA рейтингларида мажбурий даъвогар сифатида ўз позициясини сақлаб келди. Шунга қарамай, ассоциация мексикалик Хайме Мунгияга қоидаларни четлаб ўтиш, Мелиқўзиевни «айланиб ўтиб», чемпионлик камарини қўлга киритиш имконини бергани айтилмоқда. Шу воқеадан сўнг ўзбекистонлик боксчи WBAни адолатсизликда очиқ танқид қилди.