Абдумалик Ҳалаков: Ушбу мусобақада қатнашишим керакмасди

Абдумалик Ҳалаков -60 кг вазн тоифасидаги ҳал қилувчи жангда Шунқор Абдурасуловни мағлуб этди. Финалдан кейин истеъдодли боксчимиз ўз фикрлари билан ўртоқлашди:

"Таассуротларим жуда ҳам аъло. Биринчи навбатда ота-онамга, кейин мураббийларимга раҳмат айтмоқчиман. Аслида, ушбу мусобақада қатнашишим керакмасди. Андижондаги турнирнинг илк баҳсида рақибим билан тўқнашиб кетган эдим. Бироқ ота-онам мени ҳаммаси яхши бўлишига ишонтирди.

Аллоҳга беҳисоб шукрлар бўлсинки, анча тажрибали рақибимни мағлуб этишга эришдим. Тўғрисини айтсам, уларга қараб, мен ҳам даражамни оширишга ҳаракат қиламан. Шунқорга ҳурматим чексиз!"