"Ал Завра" устози: Биз "Бунёдкор"га қарши ўйинга тайёр эмасмиз

Осиё Чемпионлар лигаси саралаши плей-офф босқичида Тошкентнинг "Бунёдкор" жамоаси эртага ўз майдонида Ироқнинг "Ал Завра" клубини қабул қилади. Бугун мазкур беллашув олдидан матбуот анжумани ташкил этилди. Бу ҳақда клуб матбуот хизмати хабар тарқатди.

Анжуманнинг биринчи қисмида меҳмонлар устози Босим Қосим ҳамда ҳамда футболчи Муҳаннад Абдулраҳим иштирок этишди.

- Бизни қийин ўйин кутиб турибди. Тан олиш керак, жамоам учрашувга тайёр эмас. Чунки Ироқда чемпионат уч ой олдин тўхтатилган. Бу орада биз ўртоқлик ўйинларида ҳам майдонга тушганимиз йўқ, - дея сўз бошлади Босим Қосим.

Муҳаннад Абдулраҳим: - Бош мураббийнинг фикрларига қўшиламан. Ҳақиқатдан биз ўйинга тайёр эмасмиз. Лекин ғалаба учун қўлдан келганча ҳаракат қиламиз.

- Ўзбекистонда ҳам янги мавсум старт олгани йўқ. Қайсидир маънода ҳар иккала жамоа ҳам бир ҳолатда. Шу вазиятга нима дейсиз?

Босим Қосим: - Тўғри, балки шундайдир, лекин вазият ҳар хил. “Бунёдкор” БААда йиғин ўтказди. Йиғин доирасида ўртоқлик учрашувларида майдонга тушди. Биз аксинча, Ироқда ҳам Ўзбекистонда ҳам ўртоқлик баҳсларида майдонга тушмадик. Қолаверса, жамоамизни уч нафар асосий футболчимиз тарк этди. Тошкентга ҳам иккига бўлиниб етиб келдик. Шундай муаммоларимиз бўлишига қарамасдан биз ҳаракат қиламиз. Ироқда биздан фақат ғалаба кутишяпти.

- “Оқ-тепа”билан ўйин нега бекор қилинди?

Босим Қосим: - Майдоннинг ҳолатидан келиб чиқиб мазкур учрашувни бекор қилдим. Чунки анча вақтдан бери ўйнамаган шогирдларим бу майдонда жароҳат олишлари мумкин эди.

- Бундай ҳолатда футболчиларни учрашувга руҳан тайёрлаш қийин эмасми?

Босим Қосим: - Ҳар қандай ҳолатда ҳам ғалаба учун ҳаракат қиламиз. Таркибда тажрибали футболчилардан ташқари, ёш ўйинчилар ҳам бор. Улар бир-бирларини тўлдириб, ғалаба учун ўйнайди. Бизда бундан бошқа илож йўқ. Сабаби, учрашув тақдири битта ўйин орқали ҳал бўлади.