Александр Хомяков: "Биз учун ҳар бир ўйин финал"

“Андижон” – “Нефтчи” (0:0) учрашувидан кейинги матбуот анжуманининг иккинчи қисмида мезбонлар бош мураббийи Александр Хомяков журналистларнинг саволларига жавоб қайтарди.

- 90 дақиқа давомида кучли тарздаги ўйин бўлди. Ўйин ҳақиқий дербига хос ҳолатда жанговар дуранг билан якунига етди. Иккала жамоа бир очкодан бўлишиб олди. Йигитларга ҳам ғалабага бўлган иштиёқи учун раҳмат ва стадионда ажойиб тарзда қўллаб-қувватлаган мухлисларга ҳам миннатдорчилик билдираман. Афсуски, биз ишқибозларимизни яна ғалаба билан хурсанд қила олмадик.

- Бу сафар ҳам ўйиндан кўнглингиз тўлмаганга ўхшаяпти, шундайми?

- Буни қандай тушунтирсам экан? Биласизми, ғалаба қозонишни жуда хоҳлагандик. Ўйиндан аввал тактикамизни чиройли қилиб шакллантириб олгандик. Рақибни ҳужумда қандай ўйнашини билиб, шунга яраша тактика ишлаб чиққандик. Яна қайтараман: ғалабани жуда ва жуда истагандик. Биз ҳам, рақиб ҳам бир-биримизга ўйнаш учун имконият бермадик. Умумий маънода айтганда, ўйиндан қониқдим десам ҳам бўлаверади.

- 7 та ўйинда 2 очко олингани фонида сиз мураббийлик фаолиятингиздан қониқяпсизми?

- Нима дейишим мумкин? Ишлаяпмиз, максимум даражада меҳнат қиляпмиз. Кўп нарсани хоҳлаяпмиз, ғалабани истаяпмиз. Аммо натижа баъзида кўнгилдагидек бўлмаяпти. Албатта, раҳбарлар, ҳомийлар бор. Улар барчасини кузатиб туришибди. Бизга ёрдам беришяпти ва ўз ўрнида биз ҳам яхши натижалар билан жавоб қайтаришни мақсад қилганмиз.

- Нима учун иккинчи ҳужумчини майдонга туширмадингиз?

- Тўғри, ҳужумчи етишмаётгани маълум эди. Бироқ биз майдон марказида яхшироқ ҳаракат қилишни ўйладик ва шу қарорга келдик. Биринчи тайм охири ва иккинчи тайм бошларида марказда рақибга имкониятни бериб қўяётгандик. Улар ҳам марказда ўйинни кучайтириш мақсадида ўйинчиларини алмаштиришганди ва биз ҳам шунга қараб иш тутдик. Турли хил хавфларни инобатга олиб, майдон марказини мустаҳкамлашга ҳаракат қилдик. Ўйин охирида ҳам интилдик ва натижага эришиш учун имкон қадар марказда фаолроқ бўлиш ҳаракатида бўлдик. “Локомотив”га қарши уй ўйинимизни яхши эсласанглар керак. Ўшанда ҳам ғалабага яқин эдик. Лекин тактик хато туфайли мағлубиятга учраганмиз. Ўйин давомида турли вазиятлар бўлади. Масалан, ўша учрашувда бурчакдан тўп узатилганидан кейин рақиб хато қилган ва биз гол ургандик. Охирида тактик хатоимиз туфайли ютқазгандик. “Локомотив” билан учрашувда мағлубиятга лойиқ эмасдик.

- Жамоангиз бугун ғалаба қозонганида Кубок финали олдидан футболчиларни руҳлантириши мумкин эди. Умуман, жамоани 5 октябрь кунги финал учрашувига қандай мотивация билан руҳлантирмоқчисиз?

- Ҳар бир учрашувга футболчиларимиз учун мотивация берамиз ва биз учун ҳар бир баҳс финал. Шу сабабли бизда мотивация бўйича муаммо бўлмайди. Йигитлар буни тўғри тушунишяпти ва ғалаба учун курашишяпти. Хотиржам бўлишимиз керак. Олдинда вақтимиз бор ва футболчиларни бўлажак учрашувга яхши тайёрлай оламиз, деб ўйлайман.

- Бугун аввалги “Андижон”ни кўрмадик. Шуниси аниқки, “Навбаҳор” бу ўйинни кузатган. Балки сиз атайин кўп нарсаларни яшираётгандирсиз...

- Биз ҳар бир учрашувда ижобий натижа учун майдонга тушяпмиз. Ҳозирги “Андижон” биринчи даврадаги “Андижон”. Ҳаммада ҳам қандайдир муаммоли вазиятлар бўлиб туради. “Нефтчи”да ҳам шундай ҳолатлар бўлган. Биз ҳам қайсидир муаммоли вазиятларни бартараф этишга ҳаракат қиляпмиз. Рақибни ҳужумда фаол ўйнашини билардик. Шу билан бирга қарши ҳужумга кучли урғу қаратишини ҳам яхши сезгандик ва шунга яраша тайёрландик. Ҳимояда мустаҳкам ўйнаш ва кескин ҳужумлар ташкил қилиш бўйича чуқурроқ таҳлил қилиб, иш олиб боряпмиз. Чизиқлар ўртасидаги боғламларни яхшилаб, шу асносида ўйин ташкил қилишни ҳар сафар режа қиламиз. “Навбаҳор”ни яхши биламиз. Биз режа бўйича тайёргарлик кўрамиз, вақтимиз бор. Биринчи даврада уларга ўз уйимизда учта гол урганимиз Кубок финалида ҳам яна шундай натижа бўлади, дегани эмас. Ҳимояда тартибли ва мустаҳкам ўйнаб, ҳужумда самарали ишлаш жуда муҳим.