"AllegriBall" ёхуд шоҳликдан қувилган "Ювентус" яна тахтга қайтадими?

Туриннинг "Ювентус" клуби А Серия 17-тури доирасида "Удинезе"ни қабул қилди ва яна ўша ўзининг севимли 1:0 ҳисобида ғалаба қозонди. Ягона гол 86-дақиқада Данило томонидан киритилди. У Кьезанинг ажойиб узатмасидан сўнг бўш қолган дарвозани ишғол этди.

Муҳим ва қизиқарли фактлар.

Туринликлар қаторасига 8-баҳсни ўз фойдасига ҳал қилди. Охирги марта Массимилиано Аллегри жамоаси 9-тур доирасида амалдаги чемпион "Милан"га қарши ўйинда мағлуб бўлганди. Шундан сўнг ўтган 3 ой ичида "зебралар"ни тўхтатадиган рақиб топилмаяпти.

"Юве" кетма-кет 8-учрашувда ўз дарвозаси дахлсизлигини сақлаб қолди. Англаганингиздек, сўнгги бор Турин клуби дарвозасига яна ўша "Милан" жамоаси йўл топа олган.

"Кекса сеньора" 17 ўйиндан сўнг 12 маротаба "қуруқ ўйин" ўтказишга эришди. "Оқ-қоралар" бутун дунёга ҳақиқий итальян клуби қандай бўлишини кўрсатиб қўяётгандек, гўё.

17 турдан сўнг "Ювентус" иштирокидаги 6 беллашувда 1:0 ҳисоби қайд этилган. 5 тасида Италиянинг энг совриндор клуби ғолиб бўлган, биттасида эса мағлубият. Бежизга юқорида мазкур ҳисоб жамоанинг севимли танлови экани ҳақида ёзмаганимизни энди янада аниқроқ тушуниб олдингиз.

"AllegriBall" нима ўзи у?

"AllegriBall" - "ғалабага элтувчи йўл ҳимоядан бошланади" деган тамойилга асосланган футбол услуби. Ушбу атама "Макс" 2014-2019 йилларда "Юве" бош мураббийи бўлиб ишлаб юрган кезлари футбол жамоатчилиги томонидан қўллана бошланган.

Ғоя томонлама Симеоненинг "Атлетико"сига ўхшаб кетади. Бироқ Аллегри нисбатан пассивроқ ўйинни маъқул кўради. Футболчилар курашларга киравермайди, тортишувлар кўп ҳам юзага келмайди. Ора-орада йигитлар ҳиссиётларига эркинлик бериши мумкин. Аммо бу камдан-кам кузатиладиган ҳолат.

Қисқа қилиб айтганда, Аллегри қўл остидаги "Ювентус"ни "хотиржам жамоа" деб атасак бўлади. Таваккални хушламайдиган, ўз услубида рақибни қуролсизлантирган ҳолатда таслим этадиган Италия гранди.

"Юве" чемпион бўла оладими?

Кун тартибидаги асосий саволлардан бири. Тажриба ва футболда ҳамма нарса бўлиши мумкинлигидан келиб чиқсак, туринликларда имконият юқори. Аллегри жамоани қандай чемпион қилишни яхши билади. Айниқса, у "Ювентус" бўлса:)

Ҳозир "зебралар" юқори формада. Кейинги турда "Наполи" майдонига сафар уюштирилади. "Интер"га мағлуб бўлиб, илк бор ютқазиш ҳиссини таътиб кўрган неаполликлар азалий рақибига қарши бор кучини ишга солиши табиий. Катта эҳтимол билан мазкур тўқнашув жамоаларнинг мақсади қанчалар жиддий эканини кўрсатиб беради. "Кекса сеньора" ғалаба қозонса, юқоридаги алламбало сериялар бекорга эмаслигини исботлаган бўлади. "Наполи" 3 очко олса, "Интер"га шунчаки омад кулиб боққани, аслида, Спаллетти жамоаси ҳам анойилардан эмаслиги ойдинлашади.

Миланнинг икки жамоаси ҳам "Скудетто" учун асосий даъвогарлардан. Таркиб борасида ҳам айнан улар фаворитдек кўринмоқда. Шунга қарамай, ҳали хулоса чиқаришга эрта. Қолаверса, пойтахтнинг "бўрилар" ва "бургутлар" тўдасини ҳам эсдан чиқармаслик керак. "Рома" ва "Лацио" ҳам бу мавсум ўз олдига катта мақсадлар қўйган.

Хуллас, бу мавсум А Серия шиддат борасида АПЛ ёки Ла Лигадан асло қолишмаяпти. НЕЙТРАЛ ва холис фикрга эга мухлис ва мутахассислар буни яхши англаб турибди.

Шундай экан, Италия футболи, А Серия ҳақидаги видео, маълумот, факт, статистикалар ва шахсий, НЕЙТРАЛ фикрларни "Catenaccio" каналида кузатиб боринг. Биз сизга энг яхшисини илинамиз!!!

Шахсий фикрлар асосида ёзилган Шоҳрух Зоиров мақоласи.