Ана холос! Асенсио учун мавсум бошланмасидан ниҳоясига етиши мумкин

Мадриднинг "Реал" клуби вингери Марко Асенсио бугун Халқаро чемпионлар кубоги доирасида "Арсенал"га қарши бўлиб ўтган ўйинда жиддий жароҳат олди.

Берилган маълумотларга кўра испаниялик футболчи иккинчи бўлимда захирадан учрашувга қўшилган ва шундан сўнг жароҳат олиб, майдонни шифокорлар ёрдамида тарк этган. Таъкидлаш лозимки, у ушбу баҳсда гол уришга ҳам муваффақ бўлди.

Marca нашри тарқатган хабарга кўра Асенсионинг чап тиззаси жиддий шикастланган. Агар дастлабки ташҳислар тўғри бўлиб чиқса, у камида 8-9 ой майдонга туша олмайди ва янги мавсумни буткул ўтказиб юбориши мумкин.