Анчелотти Гюлернинг майдон марказидан гол урмоқчи бўлгани ҳақида фикр билдирди

Ла Лиганинг 29-турида "Реал" "Осасуна"ни 2:4 ҳисобида мағлуб қилди. Ўйинда мадридликлар сафида Винисиус дубль қилган бўлса, Карвахаль ва Диас биттадан гол урди.

Шунингдек, баҳснинг сўнгги сониялари ўтиб бораётган бир вақтда туркиялик ёш истеъдод соҳиби Арда Гюлер майдон марказидан рақиб дарвозасини нишонга олди. Аммо унинг зарбасидан сўнг тўп дарвоза тўсинига тегиб, майдонга қайтди. 

Учрашувдан сўнг ташкил этилган матбуот анжуманида "қироллик клуби" бош мураббийи Карло Анчелотти ўз фикрлари билан ўртоқлашди. 

"Арда Гюлер? Унинг ижроси биз учун гол, тўп тўрдан жой олмаганининг фарқи йўқ.

У гол уришни жуда истамоқда ва бу яхши. 19 ёшида бошқа футболчилар бу қадар ўзига ишонган даражада ҳаракат қила олмайди. Унинг зарбаси шунчаки мўжизавий бўлди", - деди италиялик мутахассис.