“Андижон” икки турдан бери биринчиликни ҳеч кимга бермаяпти. “Пахтакор” бироз яқинлашди. Қолганларчи?

4 – 6 август кунлари Суперлигада 15-тур баҳслари ўтказилди. Натижалар билан сайтимиз орқали хабар бериб бордик.

Ушбу турда бир қатор қизиқарли ўйинлар, ўзига хос қарама-қаршиликлар кузатилди.

Тур дуранглар билан бошланди. “Андижон” кетма-кет иккинчи бор ўз уйида ўйнаб, яна рақиб билан очколарни бўлишиб олди. Ўтган гал “бургутлар” қаршиликлар билан муроса кўчасини танлаганди. “Навбаҳор” эса ҳакам томонидан қўшиб берилган дақиқада гол ўтказиб юбориб, жуда муҳим очколарни бой берди.

Биринчи давра ғалаба нималигини билмаган “Турон” танаффусдан сўнг чемпионат доирасида иккита учрашув ўказиб, иккисида зафар қучди. Бу сафар яйпанликлар “Насаф”ни енгди.

Кубок баҳсларидан чиқиб кетган “Пахтакор” ўзбек класикосида имкониятни бой берди. “Нефтчи” иккинчи даврада ҳам “шерлар”ни мағлуб этди. “Бухоро” ниҳоят ўз ҳисобига 3 очко ёздириб қўйди.

Бир маромда ўйин намойиш эта олмаётган ОКМК Тошкентда дуранг қайд этди. “Олимпик” ажойиб кечган беллашувда “Сўғдиёна” билан муросага келди.

Энди эса турга оид қизиқарли маълумотларни тақдим этамиз. Яъни анъанамизга содиқ қолган ҳолда тур мухлислари статистикаси билан таништирамиз.

15-турда стадионларимизга жами 38373 томошабин ташриф буюрди. Бу ҳар бир беллашувга ўртача 5482ни ташкил қилади.

Энг кўп мухлис яна Андижонда. “Андижон” - “Сурхон” ўртасидаги ўйинни 12801 томошабин аренадан кузатди. Аввалги турда ҳам “бургутлар” мухлислари энг яхшисига айланганди. “Андижон”нинг “Насаф” билан беллашуви энг кўп мухлисларни жамлаганди.

“Пахтакор” - “Нефтчи” турнинг марказий учрашувига 10200 мухлис келди. Ўйинга қизиқиш юқори бўлди.

Энг кам томошабин пойтахтда. Афсуски, “Бунёдкор” - ОКМК ўртасидаги ажойиб ўтган беллашувни 1005 киши стадиондан кузатди.

Қуйида Суперлиганинг ушбу турига ташриф буюрган мухлислар статистикаси билан танишинг (мухлислар сони ПФЛ сайтидан олинди):

“Андижон” - “Сурхон” 0:0. 12801 томошабин

“Пахтакор” - “Нефтчи” 0:1. 10200 томошабин

“Бухоро” - “Қизилқум” 1:0. 6616 томошабин

“Турон” - “Насаф” 1:0. 3489 томошабин

“Металлург” - “Навбаҳор” 1:1. 2138 томошабин

“Олимпик” - “Сўғдиёна” 3:3. 2124 томошабин

“Бунёдкор” - ОКМК 1:1. 1005 томошабин