“Андижон”да бош мураббий истеъфога чиқарилгани эълон қилинганидан сўнг, жамоанинг бош директори Дониёр Муллажонов Ҳамидуллаевнинг лавозимидан озод этилгани юзасидан клуб матбуот хизматига қуйидагиларни айтди:

- Биз жамоани қабул қилиб олган пайтимизда клубдаги ҳолат яхши эмасди. Барчасини бўйнимизга олиб, жамоамизнинг қарзларини тўлаб бердик, футболчиларнинг ҳамма муаммоларини ҳал этдик. Керак бўлса, мукофот пулларини ҳам бердик. Профессионал жамоага хос тарзда шароит яратдик. Аммо футболчиларимиз бизга профессионал ўйин намойиш этиб бера олмади. Футбол бундай бўлмайди!

Бизга Суперлигада қолиш вазифаси юклатилган. Бахтиёр Ҳамидуллаев келганидан кейин керакли очколарни қўлга киритганимизда лигада қолиш имкониятимиз юқори бўларди, афсуски, очко ололмадик ва Суперлигада қолиш имкониятимиз камайиб кетди. Ўйинлар камлиги боис, юқори поғоналарни сўрамадик, аммо бу сўнгги поғоналарда юриш керак, дегани эмас.

Бир инсон қайси соҳада бўлишидан қатъи назар ўзини кўрсатиши керак бўлади, ўз соҳасининг устаси бўлиши керак. Бу ерда бутун Андижон халқининг ғурури ҳақида гап кетмоқда. Рақиб футболчилари ҳам бизникилар каби оддий инсон, уларни ҳам икки қўли, икки оёғи бор. Уч миллиондан ортиқ халқнинг шарафини ҳимоя қилиш бундай бўлмайди. Мен йигитлар билан жиддий гаплашиб олдим. Энди бундан буёғига ҳеч қандай баҳона бўлмайди, барча футболчиларимиз Андижон халқининг шаъни учун майдонга тушади. Тўғри, қолган ўйинларимиз осон бўлмайди, бироқ бу биз орқага чекинамиз, дегани эмас! Балки Суперлигада қолмасмиз, лекин кейинги йил ёки яқин 2-3 йил ичида биз кутган, мухлислар кутган, Андижон халқи соғинган футболни яратамиз, - деди Дониёр Муллажонов.

Матнда хатолик топсангиз, ўша хатони белгилаб, бизга жўнатинг (Ctrl + Enter)