"Андижон" клубига янги мавсумда учта асосий вазифа қўйилди

“Мавсум-2025” бошланишига саноқли кунлар қолди. “Андижон” футбол клуби ҳам жорий йилги биринчилик учун ҳар томонлама пухта тайёргарлик олиб борди ва табиийки, мухлислар ҳам, жамоа ҳам чемпионат бошланишини интиқлик билан кутмоқда. 

Хабарингиз бор, жамоа айни пайтда Тошкентда 8 март куни сафарда “Қўқон-1912” жамоасига қарши ўтадиган ўйин учун тайёргарлик кўрмоқда. 

“Андижон” футбол клуби бош ҳомий ҳисобланган “Узавтосаноат” АЖ бошқарув раиси Улуғбек Убайдуллаевич Розукуловнинг қабулида бўлди.

Жамоа аъзолари аввалига “Узавтосаноат” биносида жойлашган ўзига хос музей билан яқиндан танишдилар. Бу сизни беихтиёр дунё автомобиль тарихига олиб киради. Айтиш лозимки, музей икки қаватни ўз ичига олади: футболчилар биринчи қаватда автомобилсозлик тарихи ва хусусан Ўзбекистонда автомобилсозлик саноатининг ривожланиши билан танишдилар. Иккинчи қаватда эса интерактив кўргазма қисми мавжуд бўлиб, унда футболчилар табиий фанларни интерактив фаол тарздаги жараёнларини кўздан кечирдилар. Тадбирнинг аввалида жамоа аъзоларини мазкур музей билан яқиндан таништириш бежиз эмасди. Бу орқали клуб бош ҳомийсининг ривожланиш тарихи борасида тушунчага эга бўлдилар. 

Шундан кейин мажлислар залида “Узавтосаноат” АЖ бошқарув раиси бошчилигидаги жамоа аъзолари билан учрашуви бўлиб ўтди. Янги мавсум олдидан ўтказилган мазкур тадбир жараёни кўтаринки кайфиятда, очиқ ва самимий руҳда ташкил этилди. 

Раҳбарият томонидан аввалига 2024 йилги мавсумдаги ютуқ ва камчиликлар сарҳисоб қилинди. Шунингдек, қўлга киритилган Кубок учун жамоа аъзоларига яна бир бор миннатдорчилик билдирилди. “Андижон” клубига янги бошланажак чемпионатда муваффақият тилаб, футболчиларнинг ҳолати, тайёргарлиги билан қизиқди. Ўз навбатида бош мураббий Александр Хомяков ва футболчилар – Олег Зотеев ҳамда Усмонали Исмоналиев яратиб берилаётган шароит ва имкониятлар учун миннатдорчилик билдириб, янги мавсумда “Андижон” клуби ўз мухлисларини хурсанд қилиш учун бор куч ҳамда имкониятларни ишга солишларини алоҳида таъкидладилар.

Андижон вилоятининг Булоқбоши туманида клуб учун янги замонавий база барпо этилаётганидан хабарингиз бўлса керак. Учрашув давомида “Узавтосаноат” АЖ бошқарув раиси ушбу қурилиши давом этаётган мажмуа ҳамда болалар футболини ривожлантиришга қаратилган ҳаракатлар, клубнинг ўз академиясини яратиш борасида қадамлар ташланганига ҳам тўхталиб ўтди. 

Тадбир давомида жамоа олдига янги мавсумда учта асосий вазифа қўйилганлиги маълум бўлди:

1. Бу йил Ўзбекистон Кубоги финали илк бор Андижондаги “Бобур арена” стадионида бўлиб ўтади. Шу муносабат билан жамоа ўз уйида ўтадиган Кубок финалга чиқиши;

2. “Андижон” клуби Суперлигада совринли ўринлардан бирини қўлга киритиши;

3. Илк бор иштирок этадиган Осиё Чемпионлар лигаси 2 мусобақасида камида гуруҳдан чиқиш каби муҳим вазифалар белгилаб берилди.

Бундан ташқари, май ойида бўлиб ўтадиган Ўзбекистон Суперкубогида ҳам ғолиб чиқиши лозимлиги айтиб ўтилди.     

Мана шундай жиддий мақсадларга яраша бундан кейин ҳам жамоа учун барча шарт-шароитлар бекаму, кўст яратиб берилиши, клубнинг инфратузилмаси янада ривожлантирилишига ҳам алоҳида урғу бериб ўтди.

Шунингдек, ўтган йили "Андижон" сафига қўшилиб, катта ўсишга эришган, 2024 йилда жамоа таркибида энг кўп ўйин ўтказган ҳолда гол+пас тизимида энг яхши натижани қайд этиб, самарадорлигини намойиш қилган Бектемир Абдуманнонов, Андижон футболи тарбияланувчиси, жамоанинг содиқ ўйинчиси, фаолиятини асосан "Андижон" клубига бағишлаб келаётган ва Ўзбекистон Кубоги қўлга киритилишида финалда ўзининг голи билан муносиб ҳисса қўшган ҳамда иродасини намойиш қилган Муҳаммадкарим Тоиров, бир неча йилдан буён "Андижон" шарафини муносиб ҳимоя қилиб келаётган, жамоанинг Про лигадан Суперлигага чиқишида ўз ҳиссасини қўшган ва дарвозабон сифатида катта ўсишга эришаётган Элдор Адҳамов, "Андижон" футбол клубининг ривожланишида, жамоанинг эришаётган муваффақиятларида, клубни ўз тарихида илк бор Ўзбекистон Кубоги қўлга киритилишида улкан ҳиссасини қўшгани учун "Андижон" бош мураббийи Александр Хомяков “Узавтосаноат” АЖ томонидан ташаккурнома ва пул мукофотлари билан рағбатлантирилдилар.

Булардан ташқари, яқинда "Андижон"ни тарк этган Илдар Маматказин ҳам "Андижон" футбол клуби тарбияланувчиси, узоқ вақт давомида клуб шарафини муносиб ҳимоя қилган ва қатор мавсумлар давомида "Андижон" сардори сифатида жамоа ғалабаларига қўшган муносиб ҳиссаси учун худди шундай тарздаги ташаккурнома ва пул мукофоти билан рағбатлантирилди. Унинг ўрнига махсус совғани жияни Ислом Маматказин қабул қилиб олди.

Шу билан бирга нафақат "Андижон" клуби, балки Ўзбек футболи тараққиёти йўлида меҳнат қилиб, Андижонда мухлислик қилишни юқори чўққига кўтариб келаётган, Ўзбекистон Кубоги қўлга киритилишида жамоага катта далда берган ҳамда юртимизда биринчи рақамли фан-клубга айлантира олган "Андижон" фан-клуби раиси Нодирбек Тўйчиев ҳам юқоридаги каби ташаккурнома ва пул мукофоти билан рағбатлантирилди. 

Клуб бош ҳомийси томонидан бу каби қўшимча рағбатлантиришлар кейинчалик ҳам давом эттирилиши маълум қилинди.  

Ўтган йили Ўзбекистон Кубогини қўлга киритиб, ОЧЛ-2 йўлланмасига эга чиққан “Андижон” клуби босқичма-босқич қудратли жамоага айланиб бораётгани аҳамиятлидир.