"Андижон"ни Европа клубларига қарши ўйинлар кутмоқда. Улар қандай рақиблар?

Олдин хабар берганимиздек, 7 февраль куни “Андижон”ни Анталия йиғини доирасида иккита ўртоқлик учрашуви кутмоқда. Рақиблар “АСК Войтсберг” (Австрия) ва “Рауфосс” (Норвегия) клублари. Сиз ўқувчилар учун “Бургутлар”нинг бўлажак рақиблари ҳақида маълумотларни тақдим этамиз.

Австрия чемпионати, Лига 2 да иштирок этаётган “АСК Войтсберг” клуби ҳақида тўхталадиган бўлсак, 1920 йилда ташкил топган.

Жамоа ҳозирда 16 та иштирокчи орасида 16 та ўйиндан сўнг 5 ғалаба, 2 дуранг ва 9 мағлубият қайд этиб, 17\21 тўплар нисбатига кўра, 17 очко жамғариб, мусобақа жадвалида 12-ўринни эгаллаб турибди.

“Мунзер Биоиндустрие спортрак” стадиони 2000 мухлисга мўлжалланган бўлиб, 2023 йилда фойдаланишга топиширлган.

Клубнинг энг қиммат футболчиси япониялик Атсуши Заизен бўлиб, “Трансфермаркт”да унинг нархи 300 минг евро қилиб белгиланган.

Жамоани 46 ёшли маҳаллий мураббий Давид Преиб бошқариб бормоқда. У клубда мураббийликдан ташқари жамоа бошлиғи, спорт директори лавозимларида ҳам ишлаган. “АСК Войтсберг” унинг бошчилигида Лига 2 ва Австрия Кубогида ҳозирга қадар 19 та ўйин ўтказган. Шундан 7 та ғалаба, 2 дуранг ва 10 мағлубият қайд этилган.

Клуб таркибида Япония, Албания ва Словениядан келган легионерлар бор.

“Андижон”нинг яна бир рақиби – “Рауфосс” клуби бўлиб, Норвегия чемпонатида ОБОС-Лигада қатнашади (бизнинг про лигамиз каби). Клубга 1918 йили асос солинган. Ўтган йилги мавсумда “Рауфосс” 16 та жамоа орасида 30 та ўйин ўтказиб, 11 ғалаба 8 дуранг ва 11 мағлубият қайд этиб, тўплар нисбати 34\35ни ташкил қилган ҳолда 41 очко билан 8-ўринни эгаллади. Ҳозирда эса жамоа янги мавсум учун тайёргарлик кўряпти.

Клубда янги бош мураббий иш бошлади. 2025 йилнинг 1 январидан эътиборан 1991 йилда туғилган англиялик Том Дент “Рауфосс” бошқарувига киришди.

Жамоанинг энг қиммат футболчиси норвегиялик Якоб Ниланд бўлиб, унинг нархи 250 минг евро.  Шунингдек, клубда Швеция, Гана, Англия ва Германиядан келган легионерлар ҳам бор.

Клуб уй ўйинларини “НАММО” стадионида ўтказади ва 2000 минг мухлисга мўлжалланган.

“Андижон”нинг дастлабки рақиби “АСК Войтсберг” бўлиб, беллашув маҳаллий вақт билан 10:30 (Тошкент вақтига 12:30)га белгиланган бўлса, “Рауфосс”га қарши учрашув маҳаллий вақт билан 17:30 (Тошкент вақтига 19:30)да бошланади.