Англия футболида жосуслик можароси авж олди

Чемпионшип плей-офф босқичи олдидан жосуслик билан боғлиқ можаро келиб чиқди ва ҳозирда бу ҳолатни Футбол Лигаси тергов қилмоқда.

Яқин шанба куни “Мидлсбро” ўз майдонида Чемпионшип плей-офф ярим финалининг биринчи учрашувида “Саутгемптон”ни қабул қилади, кейинги сешанба эса жамоалар жавоб баҳсини ўтказади.

Чемпионшип плей-оффи ғолиби Премьер-лига йўлланмасини қўлга киритади, бу муваффақият эса клубга тахминан 200 миллион фунт миқдорида маблағ келтиради. Шу қадар катта маблағ ўртага тикилганида, клублар рақибдан устунликка эришиш учун ҳар қандай йўлга тайёр экани намоён бўлди.

The Athletic нашрининг хабар беришича, “Мидлсбро”нинг Роклифф-парк базасида бир эркак уларнинг машғулотини яширинча тасвирга олаётгани аниқланган. Тахмин қилинишича, бу шахс “Саутгемптон” мураббийлар штаби аъзоси ҳисобланади.

“Мидлсбро” ходими ушбу эркак билан тўқнашувга киришган, аммо у қочиб кетишга муваффақ бўлган. Кейинчалик “Мидлсбро” клуби Футбол Лигасига расмий шикоят юбориб, “Саутгемптон”ни жосусликда айблади ва кузатув камералари ёзувларини тақдим этишга тайёрлигини билдирди.

Шунга ўхшаш ҳолат 2019 йилда ҳам содир бўлган, ўшанда “Лидс”ни бошқарган Марсело Бьелса ўз ёрдамчисини “Дерби” клуби машғулотларини кузатиш учун юборган эди.

Ўшанда Футбол Лигаси “Лидс”ни 200 минг фунт жаримага тортган ва клубларга ўйиндан 72 соат олдин рақиб машғулотларини кузатишни тақиқловчи қоида жорий этган.