Англия юлдузи мундиалда ўйнамайдиган бўлди

Англия терма жамоаси ҳимоячиси Тино Ливраменто 2026 йилги жаҳон чемпионатини ўтказиб юборади. Бу ҳақда The Athletic нашри хабар берди.

Маълумотларга кўра, футболчи мушагидан олган жиддий жароҳати туфайли мусобақада иштирок эта олмайди.

17 июнь куни Англия терма жамоаси жаҳон чемпионатидаги илк учрашувини Хорватияга қарши ўтказади. Қоидаларга кўра, жамоалар 26 нафар футболчидан иборат якуний рўйхатга ўзгариш киритиш ҳуқуқига эга, аммо буни гуруҳ босқичидаги биринчи ўйиндан камида 24 соат олдин ва фақат футболчида жиддий жароҳат аниқланганда амалга ошириш мумкин.

Универсал ҳимоячи Ливраментонинг ўрнини Трево Чалоба эгаллайди. У бугунга қадар Англия терма жамоаси сафида фақат битта ўртоқлик учрашувида майдонга тушган.

Жаҳон чемпионатининг гуруҳ босқичида Англия футболчилари Хорватиядан ташқари яна Гана (23 июнь) ва Панама (26 июнь) терма жамоаларига қарши майдонга тушади.