Arbeloa Valverde va Tchuamenining mojarosiga izoh berdi

Madridning "Real" klubi bosh murabbiyi Alvaro Arbeloa jamoa yarim himoyachilari Federico Valverde va Orelien Tchuameni oʻrtasidagi mushtlashuv haqidagi maʼlumotga izoh berdi.

“Men ikki narsani aytmoqchiman. Birinchidan, men klubning qatʼiyati, tezligi va ochiqligi bilan juda faxrlanaman. Ikkinchidan, oʻyinchilar oʻz xatolarini tan olishdi, afsuslanishdi va uzr soʻrashdi — bu men uchun yetarli. Men qilmaydigan narsa, bu ularni omma oldida xochga mixlash, chunki ular bunga loyiq emas. Soʻnggi toʻrt oy ichida ular menga "Real" futbolchisi boʻlish nimani anglatishini koʻrsatishdi va men buni hech qachon unutmayman.

Valverde va Tchuameniga bu klub uchun kurashishda davom etish imkoniyatini berish uchun oldinga siljishimiz kerak. Men ular bilan faxrlanaman. Bu vaziyatdan ularning professionaliligini shubha ostiga qoʻyish uchun foydalanishga yoʻl qoʻymayman. Yolgʻon, ular professional emas, ular menga hurmatsizlik qilishdi... bu mutlaqo yolgʻon. Shuningdek, baʼzi futbolchilar men bilan muammolar tufayli oʻynamayotgani ham yolgʻon.

Oxir-oqibat, mavsum, ehtimol... yoʻq, aniq kutilganidek boʻlmasligi uchun men javobgarman. Lekin men toʻrt oydan beri shu yerdaman va oʻz futbolchilarim bilan juda faxrlanaman. Ular meni qanday qabul qilishgani, nimaga erishganimiz bilan. Maʼlumki, umidsizlik va gʻazab odamlar istamagan vaziyatlarga olib kelishi mumkin. Lekin hozir oʻyinga eʼtibor qarataylik. Hozir biz aynan shunga eʼtibor qaratishimiz kerak", - deya Arbelоaning soʻzlarini keltiradi AS.

7 may, payshanba kuni mashgʻulot paytida yarim himoyachilar Federico Valverde va Orelien Tchuameni oʻrtasida ogʻzaki nizo kelib chiqqani va bu kiyinish xonasida janjalga aylangani maʼlum boʻldi. Toʻqnashuv natijasida urugvaylik futbolchining boshi yorilgan va u kasalxonaga yotqizilgan. Ikkala futbolchi ham 500 ming yevro miqdorida jarimaga tortildi.