Аргентинанинг муҳим ўйинчиси мундиалнинг илк учрашувига тайёр!

Аргентина терма жамоаси дарвозабони Эмилиано Мартинес Жаҳон чемпионати гуруҳ босқичининг биринчи турида Жазоирга қарши баҳсда иштирок эта олади.

"Астон Вилла" посбони Европа лигаси финалида "Фрайбург"га қарши учрашув олдидан ўтказилган қизиш машғулоти вақтида ўнг қўлидаги бармоғини синдириб олган эди. Шунга қарамай, у финал баҳсини тўлиқ ўтказиб, жарроҳлик амалиётидан қутулган.

Журналист Гастон Эдулнинг маълум қилишича, Мартинеснинг тиббий кўрик натижалари ижобий чиққан ва ундан гипс ечиб ташланган.

Қайд этилишича, тажрибали дарвозабон махсус ҳимояланган қўлқопларда ўйнайди. Унинг Жазоирга қарши баҳсни асосий таркибда бошлаши кутилмоқда.

Аргентина ва Жазоир ўртасидаги учрашув 17 июнь куни бўлиб ўтади.