Арне Слот: "Балки "паст ҳимоя чизиғи" ҳақида камроқ гапиришим керакдир"

"Ливерпуль" бош мураббийи Арне Слот Стивен Жеррард томонидан айтилган танқидга муносабат билдирди.

Слот Чемпионлар лигасида "Марсель" устидан қозонилган 3:0 ҳисобидаги ғалабадан сўнг "Ливерпуль" "паст ҳимоя чизиғи" билан ўйнайдиган рақибларга қарши учрашувларда қийинчиликка дуч келаётганини таъкидлаган эди. Бу фикрларга жавобан Стивен Жеррард: "Паст ҳимоя чизиғи ҳақида гапиришни тўхтатиш керак", дея изоҳ берди.

"Унинг айнан қандай фикр билдирганини эшитмаганман. Аммо Стивен Жеррард ҳар доим "Ливерпуль"га ижобий муносабатда бўлган ва ҳозир ҳам шундай. У клуб учун чин дилдан қайғуради.

Паст ҳимоя чизиғи ҳақида кўп гапираётганимга келсак, бу билан розиман. Чунки биз жуда кўп ҳолларда айнан шундай ўйнайдиган рақибларга қарши майдонга тушяпмиз. Ўйиндан кейин мендан фикрим сўралса, албатта, жавоб беришим керак.

Жеррарднинг ўзи ҳам футболчи сифатида паст ҳимоя чизиғига қарши ўйнаганини айтган. Қолаверса, у маҳоратли ўйини орқали бундай ҳимояни бузиб ўта оладиган футболчилардан бири эди.

Балким, бу ҳақда бошқа сўзлар топишим ёки умуман гапирмаслигим керакдир", — деди Арне Слот.