"Арсенал" ҳимоячиси барибир клубни тарк этадиган бўлмоқда

Александр Зинченко жорий ёзда "Арсенал"ни тарк этиши эҳтимоли бор. "Give Me Sport" нашрининг хабар беришича, 28 ёшли украиналик ҳимоячига "Фулхэм" жиддий қизиқиш билдиряпти. Лондонликлар футболчининг атрофидаги шахслар билан алоқага чиққан ва расмий таклиф беришни кўриб чиқмоқда.

Манбага кўра, "Арсенал" Зинченкони тахминан 15 миллион фунт (17,4 миллион евро) атрофида баҳоламоқда.

Маълумот учун, Зинченконинг асосий таркибдаги ўйинлари Рикардо Калафьорининг трансфери ва Майлс Льюис-Скеллининг ўсиши туфайли қисқарган. Александр "канонирлар" сафида 91 та ўйинда қатнашиб, 3 та гол ва 5 та ассист қайд этган.