"Арсенал" етакчиси "Реал" учун асосий трансфер нишонига айланди

Мадриднинг «Реал» клуби Лондоннинг «Арсенал» жамоаси ярим ҳимоячиси Деклан Райсга жиддий қизиқиш билдирмоқда, деб хабар бермоқда CaughtOffside манбаси.

Манба маълумотига кўра, испан гранди раҳбариятидаги нуфузли шахслар клуб президенти Флорентино Пересни 27 ёшли англиялик футболчини ёзги трансферларда асосий мақсад сифатида кўришга чақирмоқда. 

«Реал» бош мураббийи Жозе Моуриньо ҳам Райснинг катта мухлиси саналади ва уни ўз жамоасида кўришни истамоқда.

Шу билан бирга, «Арсенал» чемпионлик таркибининг энг муҳим ўйинчиларидан бири билан ҳеч қандай ҳолатда хайрлашиш ниятида эмас. Лондон клуби ярим ҳимоячи билан шартномани яхшилланган шартлар асосида узайтиришни режалаштирган. Кутилаётган музокаралар Райсга нисбатан Европанинг етакчи клублари қизиқишини чеклашга қаратилган. Ҳозирги амалдаги келишув 2028 йил ёзигача мўлжалланган.

Деклан Райс 2023 йилда «Вест Хэм» клубидан «Арсенал» сафига жамоа тарихидаги рекорд — 105 миллион фунт эвазига ўтган эди. У қисқа вақт ичида Микель Артета жамоасининг етакчи футболчиларидан бирига айланди.