Askren UFC ning eng yaxshi yarim o‘rta vazn toifasidagi jangchisini aytdi

Sobiq Bellator va ONE chempioni Ben Askren o‘tgan hafta oxirida bo‘lib o‘tgan yarim o‘rta vazn toifasida UFC kamari sohibi Leon Edvards(21-3-1 N/C) va Kolbi Kovington(17-3) o‘rtasidagi jang haqida gapirdi.

Nafaqadagi faxriyning so‘zlariga ko‘ra, britaniyalikning g‘alabasi u yarim o‘rta vazn toifasida chempionlik unvoniga munosib ekanini ko‘rsatdi.

“Men Kovingtonning strategiyasi nima bo‘lganini bilmayman. Menimcha, u uchun eng yaxshi reja o‘z kuchini to‘g‘ri sarf etgan holda teykdaunlardan foydalanib, parterga kirmasdan jangni nazorat qilish edi. Biroq, shunday bo‘lsa-da, Kolbi o‘sha jangda Leoning zarbalaridan qo‘rqqanga o‘xshab harakat qilar va shunchaki masofani saqlar edi", – deya Askrendan iqtibos keltiradi Middle Easy.

Eslatib o‘tamiz, Edvards "UFC 296" ning asosiy bahsida Kovingtonni hakamlarning yakdil qarori bilan mag‘lub etgan edi.